گومان لە ئەنجامی کۆنگرەی کۆمەڵی دادگەریی دەکرێت

چاویارنیوز _ ئەمڕۆ لە هەولێر، بە سەرۆکایەتیی عەلی باپیر، سەرکردایەتیی نوێی کۆمەڵی دادگەری یەکەم کۆبوونەوەی خۆی دەست پێ کرد و ئەندامێکی سەرکردایەتی گۆڕی بە کەسێکیتر، محەمەد جەلیل کاندیدی دەرچووی سەرکردایەتیی کۆمەڵ، دوورخراوەتەوە و لە جێگەی ئەو موحسین حسێن دانراوە.
ئەم هەواڵە بووەتەهۆی دەنگەدەنگ و ژاوەژاو لە شەقامی کوردیدا، بەڵام ئەندامێکی کۆمەڵی دادگەری دەڵێت “دوای ئەوەی دەنگەکانی هەڵبژاردنی ئەنجومەنی سەرکردایەتی کۆمەڵ دووبارە ژمێردرانەوە، دەرکەوتووە کاندیدێک دەرچووە، بەڵام بە هەڵە بە دەرنەچوو ئەژمار کراوە”.
ئەو ئەندامەی کۆمەڵ کە نەیویستووە ناوی بڵاوبکرێتەوە، دەڵێت “دەنگەکانی شێخ موحسین حسێن، بە ژمارەیەکی بەرچاو لە دەنگەکانی محەمەد جەلیل زیاتر بووە، بۆیە گۆڕانکاری لە ئەندامێتییاندا کراوە”.
وەک کۆنگرەی زۆربەی حزبەکانیتری هەرێم، دەستکاریکردنی ئەنجامی هەڵبژاردنی سەرکردایەتیی کۆمەڵی دادگەری، گومانی خستووەتە سەر پرۆسەی هەڵبژاردنەکە و چەندین پرسیار لەناو کادرانی ئەو حیزبەیشدا دروست بووە، بەڵام بەرپرسانی باڵای حیزبەکە هیچ وەڵام و ڕوونکردنەوەیەکیان نییە.