هەندرێن شێخ ڕاغب
تازە چەند مانگێك بوو سەركردەی گەلەكەمان (ئۆجەلان) دەستگیركرابوو، بابەتی دادگاییكردنەكەی و زیندانیەكەی نەك كوردستان وتوركیا بەڵكو جیهانی تەنی بوو. گەلی كورد لەتەواوی پارچەكان و رەوەندی دەرەوە خۆپیشاندان و چالاكی بۆ ئیدانەكردنی دەستگیركردنی ئۆجەلان ئەنجام دەدا. لەشاری رانیە سەركردەیەكی پەكەكەمان بینی، زۆر بە دڵگەرمی ئەم پرسیارەم لێكرد: ئایا پەكەكەش بە دەستگیركردنی ئۆجەلان توشی شكست و كۆتایی شۆڕش نایەت؟ گوتم بە نەمانی شێخ مەحمودو قازی محمدو شێخ سەعیدی پیران و ئەم سەركردانە راستەوخۆش شۆڕشەكەش نەماوە. باشم بیرە ئەویش زۆر بە دڵگەرمی ستایشی كردم و گوتی خۆشحاڵم گەنجێكی هەرزەكاری وەك تۆ ئاوا دەزانێت پرسیار بكەیت و زۆر هانی دام و كەسایەتی بۆ دروستكردم. ئینجا ئاوا وەڵامی دامەوە: هەڤاڵ هەندرێن هیچ خەمی دەستگیركردنی رێبەر ئاپۆت نەبێت و هیچ شكستێك و كۆتاییەك لە گۆڕێ نیە، بەڵكو تازە سەردەمێكی بەهێزی كوردایەتی لە توركیاو ناو پەكەكە دەستپێدەكات، هەڤاڵ هەندرێن ئێمە ئۆجەلان دەكەین بە ئێسكێكی ئەستور لەناو قوڕگی توركیا، فڕێی بدات دەخنكێت، قوتی بدات دەخنكێت، واتە ئەگەر ئازادی بكات ئاوا كورد سەردەكەوێت، ئەگەر لە سێدارەشی بدات ئەوا توركیا بەجۆرێك توشی كێشە دەبێت سەری دەخوات.
من ئەوكات گرنگی ئەم وەڵامەم نەدەزانی هەتا ساڵانی داهاتوو. بەڵام ئێستا ترسێكم بۆ دروست بووە، توركەكان دەیانەوێت كیانی رۆژئاوای كوردستان لەناو ببەن، دەیانەوێت گۆڕانكاریەكانی دوای شەڕی حەماس و ئیسرائیل كە لە 7ی ئۆكتۆبەر دەستیپێكردووە بەری لێبگرن و بەناوی ئاشتی لەباری ببەن. دەترسم هەمان تاكتیك لە دژی كورد بكەن، چونكە میت چركە بەچركە چاودێری ئۆجەلان دەكات و لەبەردەستی خۆیانە، دەترسم بەناوی ئاشتی بەڕێز ئۆجەلان توشی دۆخێك بكەن كە بڕیار بدات هەر شكست بێت، بڕیاریش نەدات هەر شكست بێت، بەتایبەت لە دۆخی رۆژئاوای كوردستان؟.چونكە میتی توركی زۆرجار ئەم قسەیان دەگوتەوە كە پەكەكە دەیگوت ئۆجەلان لە قوڕگی توركیا گیردەكەین. بۆیە ترسم لە یاریەكانی پشت پەردەی سیاسەتی تورك هەیە؟.
No Comment! Be the first one.