چاویارنیوز – ئەمریکا نەک عیراق جێناهێڵێت بۆ دەرکەوتنەوە و هاتنەوەی بەعسییەکان، بەڵکو سیناریۆ و نەخشەی تری بۆ عیراق بەدەستەوەیە، ئەمەش لەو روانگەوەیە کە هێشتا ئەمریکا عیراق بە وڵاتێک لە بەرەی خۆی نازانێت، ئەمریکا لە عیراق ناکشێتەوە، بەڵکو جموجۆڵێک دەکات، ئەمەش بە مانای دەرکەوتنەوە و گەڕانەوەی بەعسییەکان نییە بۆ دەسەڵات و هەڵکوتانەسەر باڵەخانەکانی دەوڵەت و دروستکردنەوەی ئەمنی عامە و هەمان سیستمە تۆتالیتاری و دیکتاتۆرییەکەی جارانی بەغدا.
لەدوای هەردوو قۆناغی دەسەڵاتی بەعسییەکان لە کودەتای ساڵی 1963 و ساڵی 1968، جارێکی تر لە عیراقدا قۆناغی سێیەمی دەسەڵاتی بەعسییەکان نابینینەوە، قۆناغی سێیەم لەهەر فۆرمێکدا بێت، قورس و بڕوا پێنەکراوە، ئەو قۆناغە زەمینەی مێژوویی بوو بۆ بەعسییەکان و تێپەڕی، ئەگەر بەعسییەکان چاویان لە ئەمریکاش بێت بۆ گەڕانەوە، راستە کارێکی ئەهریمەنی دەبێت، بەڵام هیچی کەمتر نابێت لەو هەڵانەی لە ئەفغانستان و ڤێتنام و ئێراندا، ئەمریکا کردی.
واقیعی عیراقیش رێگە نادات بەعسییەکان جارێکی تر ببنەوە دەسەڵاتداری عیراق و حەوزەی سوننی ناوچەکە، نەک تەنها لە رێگەی کودەتاوە جارێکی تر دەسەڵاتی ئەوان لە عیراق نابینینەوە، تەنانەت جارێکی تر لە رێگەی پاڵنەرە دەرەکییەکانیشەوە، عیراق لەسەر بنەمای پێکهاتە و مەزهەب ناکرێتەوە خەڵات و ببەخشرێتە ئەو بەعسییانەی چاویان لە گۆڕانکارییە لە عیراقدا، وەک ئەوەی (فوئاد عەجمی)، عیراقی ساڵی 1922 بە خەڵاتی بەریتانیا بۆ سوننە ناودەبات و هەروەها حەسەن عەلەویش عیراقی 2003 بە خەڵاتی ئەمریکا بۆ شیعە ناودەبات، جارێکی تر ئەم دابەشکارییە رووناداتەوە.
پێچەوانەی هەر بۆچوون و تێگەشتنێک، ئەوەی پەیوەستە بە جموجۆڵەکانی هێزەکانی ئەمریکاوە (نەک کشانەوە)، زیاتر راماندەکێشێت بۆ واقیعی بۆچوونێکی نووسەری لوبنانی (نەسیب حەتیت) کە پێیوایە: ئەوەی ئەمریکا زەمینەسازیی بۆ دەکات، چۆڵکردنی ناوچەکانی خۆرهەڵاتی فوراتە بۆ ئیسرائیل و ئەو نەخشە نوێیەی بۆ ناوچەکە دانراوە، ئەمریکا دەیەوێت لە کەمترین ماوەدا وێنەی هەژموونداریی خۆی بگۆڕێت، لە وڵاتێکی داگیرکارەوە بۆ وڵاتێک کە بوونی بۆ عیراق و عیراقییەکان پێویستیی بێت.
یەکێک لەو بابەتانەی ئەمریکا لە درامای عیراقدا سەیری دەکات، پرۆژەیاسای حەشدی شەعبییە، هەرچەندە دەوترێت دوای خوێندنەوەی یەکەم و دووەم بۆ پرۆژەیاساکە لە ئەنجومەنی نوێنەران کشێنراوەتەوە، بەڵام ئەمریکا نەیتوانی لە رێگەی پەستانی سەربازیی و سیاسییەوە لەگەڵ لایەنە عیراقییەکان بگاتە خاڵی کۆتایی بۆ هەڵوەشانەوەی هێزەکانی حەشدی شەعبی کە زیاتر وەک (هێزی نادەوڵەتی) ناودەبرێن، بۆیە جموجۆڵکردنی لە بنکەکانی لە عیراق بۆ یەکلاکردنەوەی حساباتی ئیسرائیل و ئەمریکایە لەگەڵ 16 هێزی نادەوڵەتیی عیراقی کە ئەمریکا رێگەی بە ئیسرائیل داوە لە رێگەی گورزی سەربازییەوە بارەگا و بنکەی هەموویان لەناو ببات، ئەمریکا ئەم حساباتەی داوەتەوە دەست سەرکردەی هێزە شیعییەکان خۆیان، ئەوانیش بوون بە دوو بەرە، بەشێکیان پێیانوایە دەبێت پرۆژەیاساکە نەکشێنرێتەوە، بەشێکیشیان دەڵێن «بۆ ئەوەی ئەمریکا دژی عیراق جووڵە نەکات، پێویستە حساباتی حەشد، سفر بکرێتەوە».
چارەسەرنەکردنی هاوکێشەی حەشد و هێزە نادەوڵەتییەکان، بۆ عیراق کارەساتە، سیاسەتی ئەمریکا وەهایە، ئەو شوێنەی خوێنی لێڕشتبێت، یان ئابووری و بەرژەوەندییەکانی لە مەترسیدابێت، تێیدا خۆی بەهێزتر دەکات نەک کشانەوە و چۆڵکردن، لەدوای جەنگی ساردیشەوە 1917 تائێستا، ناوچەیەکی ژێر هەژموونی خۆیی بەبێ جەنگ چۆڵ نەکردووە بۆ دژەکانی، یان بۆ ستراتیژ و ئەجێندایەکی تر، بۆیە پێموایە ئەمریکا نەک عیراق جێناهێڵێت بۆ دەرکەوتنەوە و هاتنەوەی بەعسییەکان، بەڵکو سیناریۆ و نەخشەی تری بۆ عیراق بەدەستەوەیە، ئەمەش لەو روانگەیەوەیە کە هێشتا ئەمریکا عیراق بە وڵاتێک لە بەرەی خۆی نازانێت، هەرچیش پاڵنەرە بۆ جووڵەکانی ئەمریکا لە وڵاتی نێوان دوو رووبارەکەدا، لە سوودی ئیسرائیلە نەک بەعس و سوننە.
No Comment! Be the first one.