چاویارنیوز ـ ئازاد ئیبراهیم ئەحمەد نووسەرو ڕۆژنامەنووس لە وتارێکدا کە ئەمەی خوارەوە دەقەکەیەتی دەنووسێت:
ئێستا میدیا و میدیاكاری كورد، فۆكەسیان بەگشتی لەسەر پرسی مووچە و پەیوەندیی نێوان هەرێم و بەغدایە، لێرەدا، دوو ئاڕاستە لە كاركردنی رۆژنامەنووسانی كورد دەرکەوتووە کە راستەوخۆ هەردوو گەورە رۆژنامەنووسی دیاری ئەمریكایی (ولیام سافیر) و (كریستینا بێرگسۆن)مان، بیردەخەنەوە.
بەشێكی میدیا و رۆژنامەنووسانی کورد دەیانەوێت ئەو كێشانەی پەیوەستە بە پرسە جیاوازەكانی نێوان هەرێم و بەغداوە، خەتا و هۆكاری سەرهەڵدانیان تەنها بۆ بەغدا بگەڕێننەوە و هیچ هەڵەیەك نەخەنە ئەستۆی دەسەڵاتدارانی هەرێم، بەشەكەی تریشیان بەتەواوی پێچەوانەی گروپی یەكەمە، هەر شتێك لەم كێڵگەیەی هەواڵدا رووبدات، لە شكڵی راستەقینەی خۆی دەیخەنە دەرەوە و باری تر و رووخساری تری بۆ دادەتاشن.
لە سەروەختی پرۆسەی ئازادیی عیراقدا، بۆچوونێک لە ئەمریکا سەریهەڵدا کە دەیوت «میدیا و میدیاكارەكانی ئەمریكا هۆكارێكی سەرەکیی هێرشی ئەمریكا بوون بۆ سەر عیراق»، لەنێو ئەو رۆژنامەنووسانەدا كە ناوی دەهێنرا وەك ژەنەراڵێكی سوپای ئەمریكا بۆ گەیشتن بە عیراق (ویلیام سافیر)ە. ئەم رۆژنامەنووسە بەردەوام وا وێنەی عیراقی لای بەرپرسانی كۆشكی سپی دەكێشا كە لە نزیكترین كاتدا رژێمی بەعس بە چەكی ئەتۆم هێرش دەكاتە سەر ئەمریكا و روووداوی گەورەی كۆمەڵكوژی و جینۆساید دەخوڵقێنێت، بۆیە دەیوت «پێویستە ئەمریكا بە زەبری هێز عیراق داگیربكات».
ئەم وێنەیە، بەدیوێکی تردا، ئێستا لە شاشەی كوردیدا دەبینرێت، بەشێكی رۆژنامەنووسانی كورد «تەنانەت هەندێك بەرپرسی باڵاش!»، وا وێنای بەغدا دەكەن لە بەرامبەر كورددا، كە هەمان بەغداكەی جارانە و ئەگەر كەمێك زیاتر دەستكراوەبێت ئەوا هەموو كورد بە چەك و برسیكردن، لەناو دەبات، ئەم جۆرە رۆژنامەنووسانە ئەو جەنەراڵانەی كوردن كە حەزدەكەن نێوانی هەرێم و بەغدا بۆ چەندان توونی قووڵ سەربكێشێت.
یەكێكیتر لەو رۆژنامەنووسە ئەمریكییانەی كە وێنەكە پێچەوانە دەكاتەوە، ژنە رۆژنامەنووسی ئەمریكی (كریستینا بێرگسۆن)ە، ئەم رۆژنامەنووسە پێیوایە «ناكرێت هەمیشە دەوڵەت و دەسەڵات، میدیا وەك سوپایەكی پڕ چەكی ئامادەکراو بۆ كاتی شەڕ و پەلاماردان ئامادەبكات» .
كریستینا بێرگسۆن كتێبێكی هەیە بەناوی (لیستی رەش)، لەو كتێبەدا پێیوایە «میدیاكانی ئەمریكا سانسۆری زۆریان لەسەر رۆژنامەنووسان دانا و ئەو هەواڵانەیان بڵاونەكردۆتەوە كە زیان بوون بۆ بەرپرسانی كۆشكی سپی»، هەر میدیایەکیش ئەو هەواڵانەی بڵاوبکردایەتەوە سەرچاوەی ماددی وشک دەکرا.
ئێستا وێنەی دووەمیش لەلای بەشێكی تری میدیا و رۆژنامەنووسی كورد دەبینرێت، زۆرێکی ئەو سەرنج و رەخنانەی روویان لە بەرپرسانی كوردە، ناگوازرێنەوە و سانسۆر دەكرێن، هەر میدیایەكیش بیەوێت وێنەكە وەك خۆی پیشان بدات و خەتاكە بخاتە ئەستۆی حكومەتی هەرێم، ئەوا یان لە رووی ماددییەوە كاریگەریی دەخەنەسەری!، یان بە تۆمەت و رێگەی جیاواز هەوڵدەدرێت وێنەكەی لای بینەر و وەرگری كورد بشێوێنن.
No Comment! Be the first one.