چاویارنیوز – سێ خاڵ و تێبینییەک:
١. سەرکۆنە و ئیدانەی ویلایەتە یەکگرتووەکانی ئەمریکا بۆ پەلامارە تیرۆرستییەکانی گروپە میلیشیاکانی عێراق گرنگە، ئەم هەڵوێستە ڕوونەی باڵێۆزخانە و کونسوڵخانەی ئەمریکا داکۆکی نییە لە دەسەڵاتی هیچ حزب و گروپێک هێندەی داکۆکییە لە سیاقی کاری دەوڵەتیی عێراق و هەرێمی کوردستان پێکەوە، چەک لە دەرەوەی یاسا لە زاخۆوە تا بەصرە مەترسی هەرە گەورەی ئێستایی و ئایندەییە و هەموو لێدانێک لە هێزی ئەو گروپە میلیشیاییانە لە سودی خەڵک و ئاشتی کۆمەڵایەتیدایە.
٢. ئەمڕۆ چەند لێدوانێکم خوێندنەوە لەسەر ئەوەی گوایە ڕەشبینن بە چارەسەری کێشەی مووچە، من بە پێچەوانەوە گەشبینم (ئەو کێشەیە ان شاء الله هەر دەبێ چارەسەر بکرێت).
لاملی و هەڕەشەی نابەرپرسانەی دەسەڵاتدارانی هەرێم نەبوایە هەفتەی داهاتوو چارەسەر ببوو.
بە هیوای ئەوەی دوای بەرخوردە ڕون و ڕاشکاوەکەی نێوان سودانی و فوئاد حسێن لە کۆوبونەوەی ڕابردووی حکومەت ڕوویدا، دەسەڵاتدارانی هەرێم لەوە حاڵی ببن ناتوانن ئیدارەی قاچاغی نەوت و داهاتی هەرێم وەک ڕابردوو بدەن و لەوە تێبەگەن کە هەڵمەتی پێشوەختەی هەڵبژاردنی داهاتوو دەمێکە لای سودانی دەستی پێکردووە و رێگە نادات بە دۆڕاوی لێی دەربچێت لانیکەم دەیەوێ یەکسان بن لە ئەنجامی ئەو قۆڵبادانەی یەکتریدا کە خەڵکی کوردستان باجەکەی داوە و ئەیدات.
٣. ناڕەزایەتی جەماوەری خەڵکی هەرێمی کوردستان لە ڕابردوو و ئێستا و ئایندەشدا ئێجگار پیرۆز و گرنگ و جێگەی بایەخە، بەڵام بەڕاستی ئەزمونەکانی ڕابردوو ئەوەی سەلماندووە خەڵک دەبێت ترسی هەبێت لە بەلارێدا بردن لە لایەن دەسەڵات و ئۆپۆزسیۆنیشەوە!
دەسەڵاتی هەرێم ڕوونە کە دەسەڵاتێکی نا دیموکراتی و مافیایی و مرۆڤکوژ و دڕندەیە، ئۆپۆزسیۆنیش ئەگەر ئازایە با خۆی بەناوی خۆیەوە، بە لافیتە و دروشم و جەماوەری سیاسیی خۆیەوە بڕژێتە سەر شەقام نەک خۆی لە پەنای خواستە جەماوەرییەکانی خەڵکدا حەشار بدات و بیقۆزێتەوە بۆ وەبەرهێنانی سیاسیی و هەڵمەتی هەڵبژاردنی پێش وەختە.
تێبینییەکی گرنگ : من هەموو نوسین و سەرنج و قسەکردنێکم وەک “ڕۆژنامەوان” و وەک هاوڵاتییەکی ئەم هەرێمەیە، نە حزبیم و نە سیاسییم و نە کاندیدم و نە سەر بەهیچ ئەجێندایەکی سیاسیم هەتا داوای هەڵوێستی سیاسیم لێ بکرێ! کەسێکم وەک هاوڵاتییەکی ئەم نیشتیمانە کە لە ڕابردوودا رۆڵی میدیایی و سیاسیی و پەرلەمانیم هەبووە بە ئەرکی سەرشانمی دەزانم بێدەنگ نەبم، شەرم دەکەم “وەک زۆر کەس” خۆم بدزمەوە لەوەی دەتوانم بیکەم و پێشکەشی بکەم وەک زانیاری وەک هۆشیاری، وەک ڕادەربرین دژی ئەم هەموو ستەمەی بەرامبەر خەڵک دەکرێت، بەڵام من نە باوەڕم بە دەسەڵات و نە باوەڕم بە ئۆپۆزسیۆن هەیە تا هەبن داوای جوڵە و چالاکی سیاسیم لێبکەن، تکایە با ئەوە ڕوون بێت.
هۆشیار عەبدوڵڵا ، ئەندامی لقی سلێمانی سەندیکای ڕۆژنامەنوسانی کوردستان
No Comment! Be the first one.