یەکێتی وەک هێزی گشتی

چاویارنیوز _ پێگەو سەنگی یەکێتیی نیشتمانیی کوردستان، پێگەیەکی مێژووییە لە عێراقدا، هێزە ڕەسەن و گەورەکانی سەر ساحەی سیاسیی وڵات، لەوە تێدەگەن کە یەکێتی تەنها هێزێکی سیاسی نییە بۆ بەشداریی لە هەڵبژاردن و دەرکەوتن، بەڵکو هێزێکە لەهەمووان زیاتر کوڕی ناو کورەی گەرمکراوی دیموکراسییە، جەستەیەکی پڕبرینی ئازادی و بەرگرییە لە وڵات، بەجۆرێک 26 هەزار شەهید تەنها لە تاقەو گیانفیدایی یەکێتی دەوەشێتەوە، هەموو سیستم و بوونێکی حکومی لە عێراقی دوای 2003دا، پەنجەمۆر و ڕەنگی سیاسی و دیموکراسی یەکێتی لەسەر دیارە.
هەرشتێک، هەر پێکهێنان و کۆنفرانس و پرۆسە و حکومەتێک، یەکێتی لێ بهێنینە دەرەوە، جوانی و بەهای نامێنێت، دیداری دهۆک (کۆڕبەندی ئاشتی و ئاسایشی ڕۆژهەڵاتی ناوەڕاست (MEPS 2025) کە یەکێتی بەشداریی نەکرد و بەگرنگی نەزانی، هەموو مانایەکی ئەو کۆڕبەندە خاڵی بووەوە لە گرنگی و بەها، ئەوەندەی چاوەکان لەسەر یەکێتی بوون و ئەوەندە گوێیەکان هەڵخران بۆ دەنگی پێی یەکێتی، ئەوەندە چاوەکان (قەیسەرقوو) بوون بۆ یەکێتی و قسەی خۆیان بکەن، ئەوەندە بەشداریی و وتاری لایەنەکانیتر بایەخیان نەبوو، هەواڵی بەشداری یەکێتی بووە ڕووداو و هەواڵ نەک دیدارەکەو میوانەکان و قسەکانی ناو مێپس.
ئێستا پرسێک هاتۆتە گۆڕی گوایە حکومەتێک لەدەرەوەی یەکێتی دروست دەکرێت، هێشتا پێکنەهاتووە، کەچی یار و نەیار، یەکێتی و نایەکێتی، گەورە و بچووک، سیاسی و ناسیاسی، دەڵێن: بەبێ یەکێتی شتی وانابێت، ئەم “بەبێ یەکێتییە” یەعنی چی؟ واتا یەکێتی بۆخۆی بەتەنها حکومەتەکەیە، جوانییەکانێتی، بەهادانە بەخوێنی شەهیدەکانی، گەڕانەوەیە بۆ لۆژیک، هەڵبژاردنی دیموکراسییە بەرامبەر ڕەتکردنەوەی هەموو تاکڕەوی و دیکتاتۆریەت و قۆرغکردنی دەسەڵات و حاکمیەتی لایەنێک بەسەر لایەنەکانی دیکەدا.
لە عێراقیش هێڵەکە درێژکراوەی هەرێمە، تابلۆ سیاسییەکە بەبێ یەکێتی ناتەواوە، هەر ئەوەش وادەکات زۆرترین هێزی سیاسی لەسەر مێزی دیدارەکانی یەکێتی کۆدەبنەوە.
بێبەشکردن، یان هەر ویستێک بۆ ئاوتکردنی یەکێتی، نەک “خەونی دۆنکیشۆتی”یە بەڵکو هێزپێدانە بە یەکێتی، تەنها کردنەوەی یەکێتی واتا وێنەدانەوە لە بارتەقای مێژووی یەکێتی، تەنهاکردنەوەی یەکێتی شکاندنی یەکێتییە، لەهەر جێگەیەکدا، لەناو هەر پرۆژە و پرۆسەیەکدا، واتە بەگشتیکردنی یەکێتی، کاتێک یەکێتی لە مێپس بەتەنها بەشداری نەکرد، هەموو جوانییەکانی لەگەڵ خۆیدا بردە دەرەوەی کۆڕبەندەکە، واهەستمانکرد کۆڕبەندێکی ساردو سڕو بێگیانە، بۆیە ئەوەندەی جوانی و مانا لەبەشدارینەکردنی یەکێتی دەخوێنرایەوە، ئەوەندە بایەخ بە کۆڕبەندەکە نەدرا، لەو ڕوانگەیەوە یەکێتی تەنها نەکرا بەڵکو هەموو جوانی و مانا و هێزێکی لەگەڵ خۆی هێشتەوە و پێیوتین جوانییەکان لەوەدایە کە خەڵک بەدوای هۆکاریی بەشدارینەکردنی یەکێتییەوەبوو.
لەهەرێم و بەغدا، وێنەکە بۆ یەکێتی و هێزە کوردستانییەکانی دیکە جیاوازە، یەکێتی هەم هێز و مێژووە، هەم هەڵگری دیدگای “قوڵایی ستراتیژی”یە بۆ بەغدا، ئەمەش واتا نەک ئاوت ناکرێت، بەڵکو هەموو هێزەکانی عێراق دەخوازن پۆستی سەرۆک کۆمار لای یەکێتی بمێنێتەوە.