ئاڤابوونی کەلتوری ئاڤامیدیا / ئازاد ئیبراهیم ئەحمەد

چاویارنیوز – کارکردنی ئاڤا میدیا، کارکردنی کەلتورییانەی حزبە، حزبێک تا ئەبەد ناتوانێت بەسەر ئەو دڵڕەشی و پیلانگێڕییەدا بازبدات و تێیپەڕێنێت کە دژی سلێمانی و جوگرافیایەکی دیاریکراو هەیەتی، ئەم فۆرمەی کارکردنی میدیای پارتی شتێک نییە بەناوی نوێگەریی و فۆرمی تازەی میدیا، بەڵکو هەمان ستایل و هەمان بورکانە نەرێنییەکەی ناخی حزبە و لەشاشەوە بە ڕووی سلێمانیدا دەیپەرژێنێت.
ئەم فۆرمی کارکردنە هەمان فۆرمی پیلانگێڕییانە و حزبییانەی پارتییە، ئەگینا دەمێک ساڵە پارتی پێیوایە هیچ شتێک بەبێ ناوەندی پارتی ناکرێت، کەواتە ئەوەی ئاڤا میدیاکەیان دەیکات بەتەواوی و بەئاگایی لێپرسراوانی ئەو حزبە دەکرێت و ویستێکی ناوخۆیی پارتی لە نزیکەکانی خاوەن کەناڵەکە پشتیوانی هەموو هێرشە ناڕەوانی کەناڵەکە دەکەن.
دوو مێنتاڵێتی دژ و دوو دژە ئاراستە لە وجوودی یەک حزبدا کۆنابێتەوە، ناکرێت حزبێک بەدروشم دەستپێشخەری هەبێت بۆ یەکڕیزی ناوماڵی کورد و باسی بەهێزی کورد بکات لە بەغداد، بەڵام میدیاکانیشی بەربداتە گیانی هاووڵاتیان و بەچەپ و ڕاستدا هێڵ بهێنن بەسەر جوانییەکانی سلێمانیدا، بۆیە ڕاستترە بڵێم وەک چۆن هەموو نەتەوەییبوونێکی پارتی خاڵییە لەمانا، ئەوا هەموو کارکردنێکی ئاڤامیدیاش بۆسەر سلێمانی ئاڤادەبێت و تێکدەشکێت، بەڵام دواجار ئەوەشمان بۆ دەردەکەوێت کە کەلتوری پارتی دژی سلێمانی، هەر میدیایەکی لەم چەشنە بەرهەم دەهێنێت.
ئەگەر نزیکتریش باس لە ئاڤابوونی کەلتووری ئاڤامیدیا بکەم لە سەر هاووڵاتیانی سلێمانی، ئەوا لەهەڵبژاردنەکانی ئەنجومەنی نوێنەرانی عێراقدا بەباشی هەستمان پێکرد، شکستی پارتی لەناوچەی سلێمانی، ئاڤابوونی حزبە، بەئاڤابوونی کەلتوری ئاڤامیدیاشەوە.