چاویارنیوز – هەرێمی کوردستان جارێکی دیکە لە دواکەوتنی پێکهێنانی کابینەی نوێی حکومەتی هەرێم ریکۆردی نوێی شکاند، بەو پێیەی نزیکەی ۱۰ مانگە هەڵبژاردن کراوە و کابینەی حکومەت پێک نەهاتووە.
ڕۆژی ۲۰ی ئەم مانگە ١٠ مانگ بەسەر ئەنجامدانی هەڵبژاردنی خولی شەشەمی پەرلەمانی کوردستان تێپەڕی و هێشتا هیچ ئاسۆیەک بۆ پێکهێنانی حکومەت نییە.
پێشتر نۆ کابینەی حکومەتی هەرێم پێکهێنراون و هیچکام لەکابینەکان لەدوای هەڵبژاردن هێندەی پێکهێنانی کابینەی دەیەم دوانەکەوتوون.
لە کوردستان دواکەوتنی پێکهێنانی حکومەت لە کابینەی هەشتەمەوە دەستپێدەکات کە ٨ مانگ و ۲۷ ڕۆژ دواکەوت.
کابینەی هەشتەم لە ۱٨ی حوزەیرانی ۲۰۱٤ پێکهات، ئەوەش دوای کەمتر لە نۆ مانگ لە هەڵبژاردنی پەرلەمان لە ۲۱ی ئەیلولی ۲۰۱۳.
کابینەی نۆیەم نۆ مانگ و ۱۰ ڕۆژ دوای هەڵبژاردنی خولی پێنجەم پێکهێنرا بەجۆرێک لە ۳۰ ئەیلولی ۲۰۱٨ هەڵبژاردن ئەنجامدرا و لە ۱۰ تەمووزی ۲۰۱۹ حکومەت پێکهێنرا.
پێش کابینەکانی هەشتەم و نۆیەم پێکهێنانی حکومەت چەند مانگێکی کەم لەدوای هەڵبژاردنەکان پێک دەهات، بەڵام لەدوای هەڵبژاردنی خوولی چوارەم و بەشداری گۆڕان لەحکومەت پێکهێنانی حکومەت بەهۆی کێشەکانی نێوان پارتی و یەکێتی دوا دەکەوێت و بە ئەگەری زۆرەوە پێکهێنانی کابینەی دەیەم دەکەوێتە دوای هەڵبژاردنی پەرلەمانی عێراق و دواکەوتنی پێکهێنانی حکومەت بۆ یەکەمجار لە هەرێمی کوردستان ساڵێک تێدەپەڕێنێت.
بەپێی دوایین هەڵبژاردنی خولی شەشەمی پەرلەمانی کوردستان، پارتی ۳۹ کورسی، یەکێتی ۲۳، نەوەی نوێ ۱٥، یەکگرتوو ۷، هەڵوێست ٤، کۆمەڵ ٣، بەرەی گەل ٢ کورسی و گۆڕان و سۆشیالیست هەریەکەو کورسیەکیان بەدەستهێنا.
No Comment! Be the first one.