تابلۆیەکی دزراو پاش ٥٠ ساڵ دەگەڕێتەوە بۆماڵی خۆی

چاویارنیوز ـــ ژنێکی خەڵکی ئینگلتەرا تابلۆیەکی سەدەی ١٦، کە ٥٠ ساڵ لەمەوبەر دزرابوو، ڕادەست کردەوە.

تابلۆیەکی سەدەی ١٦ کە وێنەی مەریەمی پیرۆز و حەزرەتی مەسیحی تێدایە، پاش ئەوەی نیو سەدە لەمەوبەر لە مۆزەخانەی ئیتاڵیا دزرا، کەوتە دەستی ژنێکی خەڵکی “نۆرفۆلک” و بڕیارە بگەڕێندرێتەوە بۆ خاوەن یاسایی خۆی.

ڕۆژنامەی گاردیەنی بەریتانی نووسیویەتی، “باربارا دو دوزرا” دوای ساڵانێک ململانێ لەگەڵ خۆی و بە ڕازیکردنی لە لایەن پارێزەرێکی هونەری، بڕیاریدا تابلۆکە بداتەوە مۆزەخانەی “بێلونۆ”، کە دواجار لە ساڵی ١٩٧٣دا تابلۆکەی هەڵگرتبوو.

ئەو تابڵۆیە لەلایەن “ئەنتۆنیۆ سۆلاریۆ”، هونەرمەندێکی بە ڕەچەڵک ئیتاڵی ناسراو بە “لی زینگارو” (جیپسی) کێشراوە. هەندێک لە تابلۆکانی دیکەی لە گەلەری نیشتمانی لە لەندەن هەڵگیراون.

ئەم بەرهەمە هونەرییە لە ساڵی ١٨٧٢ لەلایەن مۆزەخانەی بێلونۆوە کڕیا و یەکێک بووە لەو کارانەی کە پاش سەدەیەک دزرا. دواتر بەشێک لەو بەرهەمانە لە نەمسا دۆزرایەوە، هەمان شوێن کە هاوسەرەکەی “باربارا دو دوزارا” تابلۆی “سۆلاریۆی” لە سەرچاوەیەکی نادیارەوە کڕی.

“ئۆسکار دی پێلێگرین”،  شارەوانی شاری “بێلونۆ” لەم بارەوە دەڵێت: گەڕاندنەوەی ئەم تابلۆیە، واتە گەڕاندنەوەی بەشێک لە ناسنامە و مێژوو و ڕۆحی ئەم شارە.