چاویارنیوز – عەزیز ئەحمەد، جێگری بەڕێوەبەری نوسینگەی مەسرور بارزانی، سەرۆك وەزیرانی هەرێم داوای بەدەنگەوە هاتنی ئەمریكا دەكات لەبەرامبەر هێرشە درۆنییەكان و دەشڵێت، بەبێ بەرهەمهێنانی نەوت، مانەوەی هەرێمی كوردستان و ژێرخانەكەی لەبەردەم هەڕەشەدان.
عەزیز ئەحمەد، جێگری بەڕێوەبەری نوسینگەی مەسرور بارزانی، سەرۆك وەزیرانی هەرێم، لە پەیامێكدا لە تۆڕی كۆمەڵایەتی ئێكس، وتویەتی، هەرێمی كوردستان لەدوای هێرشی درۆنی گروپە چەكدارە تاوانكارەكان، بەرهەمهێنانی نزیكەی 200 هەزار بەرمیل نەوتی لەدەستداوە.
وتوشیەتی، پێنج كێڵگەی نەوتی هەرێم كراونەتە ئامانج كە دوانیان لەلایەن كۆمپانیا ئەمریكییەكانەوە بەڕێوەدەبرێن.
جەختیشی كردۆتەوە كە “بەرهەمهێنانی ئەو نەوتە، مایەی مانەوەی روناكی و كاركردنی حكومەتە. بەبێ ئەوە، مانەوەی هەرێمی كوردستان و ژێرخانەكەی لەبەردەم هەڕەشەدان.”
هەروەها ئاماژەی بەوەشداوە “حكومەتی هەرێمی كوردستان پێشوازی لە سەرمایەگوزاری و كۆمپانیا ئەمریكییەكان كردوە.
ئێستا هەمان ئەوسەرمایەگوزارانە، لە هەڵمەتێكی بەرنامە بۆداڕێژراودا، وەدەردەنرێن، ئەوەش لەپێناو خنكاندنی ئابوریی ئێمە.”
عەزیز ئەحمەد هێمای بۆ ئەوەش كردوە “هاوبەشە ئەمریكییەكانمان لەمێژە بێبەشیان كردوین لە ئامڕازە پێویستەكان بۆ بەرگریكردن لە وزەو ژێرخانی مەدەنی خۆمان. ئێمە لە ئێستادا پێویستمان پێیانە بۆ ئەوەی یارمەتیدەرمان بن بۆ بەرگریكردن لە خۆمان – ئێمە بەتەواوەتی دەزانین كێ لەپشت ئەم هێرشانەوەیەو لەكوێشەوە دێن.”
هەروەها وتوشیەتی”هێشتا هیچ پەیوەندییەكمان لە ماركو روبیۆ، وەزیری دەرەوەی ئەمریكاوە پێ نەگەیشتوە. تەنیا وشە بەس نییە لەوە زیاترمان پێویستە.”
No Comment! Be the first one.