غازاتی گەدە یەکێکە لە کێشە باوەکانی کۆئەندامی هەرس کە بەزۆری بەهۆی هۆکاری جۆراوجۆری وەک خۆراک، شێوازی ژیان، فشاری دەروونی یان تێکچوونی کۆئەندامی هەرسەوە پێک دێت. چارەسەری غازات بە شێوازی دەرمانی و گیایی و هەندێ جوڵەی ڕاهێنان ئەنجام ئەدرێت. هەروەها پێویستە هۆکاری ڕوودانی و تەمەنی کەسەکە لەبەرچاو بگیرێت. لە ئەنجامدا، کاتێک چارەسەرکردن ئەنجامێکی باشتر دەدات کە هۆکاری سەرەکی ڕوودانی بە دروستی دەستنیشان بکرێت و جگە لە چارەسەری خێرا، دەبێ لەسەر ڕاستکردنەوەی خووە خراپەکان کار بکرێت.
غازاتی گەدە چییە؟
غازات یان ئاوسانی گەدە حاڵەتێکە کە غازی زیادە لە گەدە و ڕیخۆڵەکاندا کۆدەبێتەوە و دەبێتە هۆی هەستکردن بە قورسایی، فشار، یان غازاتی لە سکدا. ئەم حاڵەتە لەوانەیە نیشانەکانی وەکو ڕشانەوە و دەنگی سک و ئازارێکی سووک تا توندی لەگەڵدا بێت. بەزۆری ئازارەکە دوای خواردن زۆرتر هەستی پێدەکرێت.
ئاوسانی بۆ خۆی وەکوو نەخۆشی نایتە ئەژمار، بەڵام دەکرێت نیشانەی خراپی خووی خواردن، هەندێک خۆراک، هێواشی هەرسکردن، یان هەستیاری کۆئەندامی هەرسکردن بێت. خۆشبەختانە بۆ زۆر کەس غازاتی گەدە کاتییە و دەتوانرێت بە گۆڕینی خووەکانی ڕۆژانە چارەسەر بکرێت.
شێوازی چارەسەری دەستبەجێ بۆ غازاتی
کاتێک لەناکاو غازاتی سک ڕوودەدات، مرۆڤ بەزۆری بەدوای ڕێگەچارەیەکدا دەگەڕێت کە دەستبەجێ یان لە ماوەیەکی کەمدا ئازارەکە کەم بکاتەوە. ئەو ڕێگایانەی کە لە خوارەوە باسی دەکەین دەتوانن زۆر بە خێرایی غازاتی سک کەم بکەنەوە بە یارمەتیدانی دەردانی غاز و هێورکردنەوەی کۆئەندامی هەرس.
- خواردنی چای نەعنا
- مەساجێکی نەرمی سک
- خواردنەوەی ئاوی گەرم یان شلەتێن
- ڕۆیشتن بە هێواشی دوای نانخواردن
- پاڵکەوتن بە لای چەپەوە
- بۆ ماوەیەکی کاتی دوورکەوتنەوە لە پاڵکەوتن بە تەواوی
هەندێک لەو ڕێگایانە خۆپارێزین و هەندێکی تریان وەکوو شێوازی چارەسەرن بەکار دێن. لە خوارەوە بە وردی ڕوونی دەکەینەوە کە چۆن هەریەکێک لەمانە بە دروستی ئەنجام بدرێت.
هەروەها بخوێنەوە: چارەسەری قەبزی لە منداڵ و گەورەساڵاندا
بەکارهێنانی چای نەعنا
نەعنا تایبەتمەندی دژە کرژبوونی هەیە و دەتوانێت گرژبوونی نائاسایی ڕیخۆڵە ئارام بکاتەوە. کوپێک چای نەعنای گەرم، بەتایبەتی لە کاتی غازاتی سک، گرژبوون، یان هەستکردن بە فشار، لە ماوەیەکی تاڕادەیەک کورتدا کاریگەری خۆی نیشان دەدات.
مەساجکردنی نەرمی سک
مەساجکردنی سک بە جوڵەیەکی بازنەیی بە ئاراستەی کاتژمێر یارمەتی جوڵاندنی غاز دەدات لە ڕێگەی ڕیخۆڵەکانەوە. ئەم شێوازە زۆرترین کاریگەرە بۆ چارەسەری غازاتی سک کە هەستکردن بە گرژبوون یان گیربوونی غازی لەگەڵدایە. ئەگەر بە فشارێکی نەرمەوە ئەم کارە بکەیت، بەزۆری هەستێکی ئارامی دروست دەکات.
خواردنەوەی ئاوی گەرم یان شلەتێن
ئاوی گەرم دەتوانێت ماسوولکەکانی کۆئەندامی هەرس ئارام بکاتەوە و پەستانی ناو سک کەم بکاتەوە. مەبەست لە ئاوی گەرم واتە ئاوی شلەتێن کە پلەی گەرمی ٢٥ پلە بێت. بۆ هەندێک کەس ئەم کارە سادەیە یارمەتیدەرە بۆ کەمکردنەوەی غازاتی سک لە ماوەیەکی کەمدا. بەتایبەت ئەگەر غازاتی سک بەهۆی خاوبوونەوەی هەرسکردن یان قەبزییەکی سووکەوە بێت.
پیاسەی هێواش پاش نانخواردن
چەند خولەکێک بە هێواشی ڕۆیشتن دەبێتە هۆی هاندانی جوڵەی سروشتی ڕیخۆڵە و یارمەتیدەرە بۆ جوڵە و دەرکردنی غازی کەڵەکەبوو بە ئاسانی. هەوڵبدە بۆ ماوەی دە خولەک ئەم کارە بکەیت و پاشان خۆت ڕامەکێشە. ئەم شێوازە بە تایبەتی بۆ غازاتی سک کە دوای ژەمە قورسەکان ڕوودەدات بەکاردێت و پێویستی بە هیچ کارێکی تایبەت نییە.
پاڵکەوتن بە لای چەپەوە
پاڵکەوتن بە لای چەپەوە یارمەتیدەرە بۆ نەهێشتن و دەرکردنی غازا لە گەدە و ڕیخۆڵەکاندا. لە ڕووی ئەناتۆمیەوە ئاسوودەتر و گونجاوترە بۆ کۆئەندامی هەرس، هەندێک کەسیش تەنها پاش چەند خولەکێک لەم دۆخەدا هەست بە کەمبوونەوەی بەرچاوی غازاتی دەکەن.
بۆ ماوەیەکی کاتی لە پاڵکەوتنی تەواو خۆت بپارێزە
لە هەندێک حاڵەتدا، پاڵکەوتن بە تەختی لەسەر پشت ڕاستەوخۆ دوای خواردن دەبێتە هۆی خراپترکردنی غازاتی سک. ئەگەر هەستت بە غازاتی سک کرد باشتر وایە بە دانیشتن یان نیمچە دانیشتن بمێنیتەوە بۆ ئەوەی غازەکە بە ئاسانی بجوڵێت و پەستانی سک زیاد نەکات. دوای 30 بۆ 60 خولەک دوای نانخواردن دەتوانیت لەسەر پشتەوە پاڵبکەویت.
باشترین دەرمانەکان بۆ غازات
هەڵبژاردنی دەرمانی گونجاو بۆ غازاتی سک بە توندی بەندە بە نیشانەکان و هۆکاری پێکهاتنی و بارودۆخی جەستەی تاکەکەسەکەوە. هەندێک کەس بە دەرمانی کیمیایی زوو هەست بە باشتر بوون دەکەن، لە کاتێکدا بۆ هەندێکی تر بژاردەی گیایی نەرمتر و بەرگەگرتنی زیاترە.
دەرمانی کیمیایی
حەبی دایمتیکۆن هۆکارە بۆ دەرچوونی غاز و کەمکردنەوەی پەستانی سک. ئەم دەرمانانە تاڕادەیەک خێرا کاردەکەن و بەسوودن بۆ غازاتی دوای ژەمەکان یان غازاتی سک کە بەهۆی زیادەڕۆیی لە خواردنەوە دروست دەبێت. بەڵام دەرمانی کیمیایی بەزۆری کاتێک بەکاردەهێنرێت کە غازاتی سک زۆر بێت یان زوو زوو ڕووبدات.
هەروەها بخوێنەوە: چارەسەری ددان ئێشە دەستبەجێ لە ماڵەوە
چونکە بەکارهێنانی درێژخایەنی ئەم دەرمانانە بەبێ لێکۆڵینەوە لە هۆکاری بنەڕەتی غازاتی سک پێشنیار ناکرێت، باشترە بیر لە چارەسەرێکی هەمیشەیی بکرێتەوە. بۆیە هەوڵبدە لە ئەگەری بەکارهێنانی بۆ ماوەیەکی درێژدا، ڕاوێژ بە پزیشک بکەیت.
چارەسەری گیایی و سروشتی
چارەسەری گیایی بەزۆری کاریگەرییەکی سووکتریان هەیە، بەڵام بژاردەیەکی باشە بۆ بەکارهێنانی بەردەوام یان غازاتی سووک بۆ مامناوەند. گیای وەک ڕازیانە و زیرە و نەعنا و زەنجەفیل یارمەتی کەمکردنەوەی غاز و باشترکردنی هەرسکردن دەدەن. هەروەها دەتوانیت ئەم خۆراکانە بە شێوەی چای گیایی و دڵۆپ و کەپسول بەکار بهێنرێت.
چۆن چارەسەری ئاوسان و غازات لە سکی منداڵدا بکەین؟
غازاتی کۆرپە بەزۆری بەهۆی قووتدانی هەوا لە کاتی شیرپێدان یان بەهۆی ناتەواوی کارکردنی کۆئەندامی هەرسەوە دروست دەبێت. باشترین ڕێگە بۆ چارەسەرکردنی غازاتی گەدە لەم تەمەنەدا بریتییە لە دەرکردنی هەوا دوای هەر خۆراکدانێک، ئەمەش دەبێتە هۆی ڕێگریکردن لە کۆبوونەوەی غاز لە گەدەدا. هەروەها خەواندنی منداڵ بە پاڵەوە یان مەساجکردنی سکی زۆر بە نەرمی، یارمەتیدەرە بۆ کەمکردنەوەی ئاوسانی و غازاتی سک لە زۆر حاڵەتدا.
لە منداڵانی گەورەتردا ئاوسانی سک زیاتر پەیوەندی بە جۆری خۆراک و خواردنی زۆر خێراوە هەیە. بۆ خۆپاراستن و چارەسەرکردنی باشترە منداڵەکەت فێری خواردنی هێواش بکەیت. هەروەها کەمتر بەکارهێنانی خواردنەوە غازییەکان و خواردنەکانی تر وەکو فاسۆلیا و نۆک.
No Comment! Be the first one.