خەرجییەکانی عێراق ڕادەگیرێن و ئایندەی دوو مووچەی هەرێم نادیارە

چاویارنیوز _ ئەگەرچی ڕێککەوتنی نێوان هەرێم و فیدراڵ کراوە و تێیدا بڕیاری چارەسەریی مووچەی مووچەخۆرانی هەرێم دراوە، بەڵام لەگەڵ ئەوەی تەنها 40 ڕۆژ ماوە بۆ داخستنی ساڵی دارایی عێراق، هێشتا مووچەی مانگی 9ی مووچەخۆرانی هەرێم و مووچەکانی مانگی 10و 11 و 12 بە نادیاری ماوەتەوە و پێویستی بە ڕێککەوتنی سیاسیی خێرا هەیە.
بەپێی زانیارییەکان، چاوەڕوان دەکرێت لە کۆبوونەوەی ئەمڕۆ دووشەممەی ئەنجومەنی وەزیرانی عێراقدا، بڕیار لەسەر خەرجکردنی مووچەی مانگی ئەیلول (مانگی 9)ـی مووچەخۆرانی هەرێمی کوردستان بدرێت، ئەگەر ئەم بڕیارە دەربچێت، ئەوا مووچەی مانگی 10ـی هەرێمیش ئەگەری زۆرە تا پێش 25ی کانوونی دووەم خەرج بکرێت.
میدیاکانیش ئاماژە بەوەدەکەن، کێشە سەرەکییەکە لە مووچەی مانگەکانی 11 و 12ـدایە. بەگوێرەی یاسا، لە 25ی کانوونی یەکەمی هەموو ساڵێک، سەرجەم خەرجییەکانی حکومەتی فیدراڵی ڕادەگیرێن و دوای ئەو ڕێککەوتە هیچ خەرجییەکی ساڵی 2025 نامێنێت.
شایانی باسە، ساڵی پار مووچەی مانگی 11 لە 17ی کانوونی یەکەمدا نێردرا، بەڵام مووچەی مانگی 12 دابەشنەکرا و نادیارە ئایا دەدرێتەوە مووچەخۆران یان نا. ئێستاش مەترسیی دووبارەبوونەوەی هەمان سیناریۆ بۆ مووچەکانی کۆتایی ئەمساڵ لە ئارادایە.