ڕەنگە نرخی نەوت بۆ سەروو 70 دۆلار بەرزببێتەوە

چاویاریانیوز _ موزهیر محەمەد ساڵح ڕاوێژکاری دارایی سەرۆک وەزیرانی عێراق دەڵێت: ڕەنگە بەبۆنەی هێرشەکەی ئەمریکاوە بۆسەر ڤەنزوێللا، نرخی نەوت بەرزببێتەوە بۆ سەروو 70دۆلار، چونکە تەنها کێشەیەکی ناوخۆیی نییە، بەڵکو ڕاستەوخۆ کاریگەریی خراپی دەبێت بۆسەر سەقامگیریی بازاڕی وزە لە جیهاندا.
​ڕایگەیاندووە، هەرچەندە ڤەنزوێللا لەئێستادا توانای بەرهەمهێنانی سنووردارە (700 بۆ 800 هەزار بەرمیل)ە، بەڵام ئەو وڵاتە لە بازاڕی وزە و نەوتدا “یاریزانێکی پەراوێزخراو” نییە، بەڵکو زۆربەی بەرهەمەکەی، لەجۆری نەوتی قورسە، کە پاڵاوگە گەورەکانی جیهان پشتی پێدەبەستن. هەروەها ڤەنزوێللا خاوەن گەورەترین یەدەگی نەوتی پشتڕاستکراوەیە لە جیهاندا و لەڕووی پێگەی ستراتیژییەوە گرنگییەکی ڕەمزی باڵای هەیە لە هاوسەنگیی وزەی نیوەگۆی ڕۆژئاوای زەوی.
​موزهیر محەمەد ساڵح ئاماژەی بەوەشکردووە، فراوانبوونی ئاڵۆزییەکان کاریگەریی ڕاستەوخۆی لەسەر بازاڕی نەوت دەبێت و ڕەنگە نرخی نەوت هەڵبکێشێت بۆ سەرووی 70 دۆلار یان زیاتر بەرز ببێتەوە، کە ئەمەش لە بازاڕی نەوتدا بە “مەترسی سیستماتیک” ناودەبرێت.