بارزانی جەخت لەسەر پرەنسیپەکانی “هاوسەنگی، سازان و هاوبەشی” دەکاتەوە

چاویار ـــ مەسعود بارزانی سەرۆکی پارتی وێڕای ئاماژە بە کێشەکانی نێوان هەرێم و بەغدا هەمدیسان جەخت لەسەر ئەوە دەکاتەوە “هەموولایەك لە عێراق دربێ پابەندی هەر سێ پرەنسیپی هاوسەنگی، سازان و هاوبەشی بن.”
مەسعود بارزانی یەکشەممە 25ی ئایار، لە سەلاحەددین پێشوازیی لە ژمارەیەك ئەمیر، سەرۆك هۆز و كەسایەتیی هۆزەكانی پارێزگاكانی باشوور و نێوەڕاستی عێراق کرد و چەند پرسێکیان باسکرد.
بەپێی راگەیێندراوی بارەگای بارزانی، ناوبراو لە گوتەیەكدا بۆ ئامادەبووان ئاماژەی بە مێژووی دامەزراندنی دەوڵەتی عێراق، ئەو نەهامەتی و زووڵمە كرد كە حكومەتەكانی عێراق بەسەر گەلی كوردستانیان هێناوە.
ئەوەشی خستەڕوو، “بوونی ناكۆكیی گەلی كوردستان لەگەڵ حكومەت و رژێمەكان بە مانای ناكۆكی لەگەڵ گەل و پێكهاتەكانی عێراق نایەت و سیاسەتی هەڵەی حكومەتەكان هەرگیز ناتوانێت پەیوەندیی نێوان گەلان تێك بدەن.”
بارزانی راشیگەیاند، “حەز دەكەن هەموو عێراق ئاوەدان بێت، ببوژێتەوە و كەرامەتی هاووڵاتییان لە هەموو بەشەكانی عێراق پارێزراو بێت.”
لە بەشێكی دیکەی گوتەكانیدا، بارزانی وێڕای ئاماژەدان بە كێشەكانی نێوان حكومەتی هەرێمی كوردستان و حكومەتی عێراقی فیدڕاڵ، ئەوەی دووپات كردەوە، “ناكرێت قووتی هاووڵاتیان بە سیاسی بكرێت و وەكو چەكێك لە دژی خەڵكی كوردستان بەكاربهێندرێت.” جەختیشی لەوە كردەوە، “حوكمڕانیی لە عێراق كاتێك سەركەوتوو دەبێت كە دەستوور جێبەجێ بكرێت و هەموولایەك پابەندی هەر سێ پرەنسیپی هاوسەنگی، سازان و هاوبەشی بن.”