تورکیا کارتی ئاو دژی عێراق بەکاردەهێنێت

چاویارنیوز – مامۆستایەکی زانکۆ ڕایدەگەیەنێت: تورکیا دەیەوێت کارتی ئاو بەرامبەر عێراق بەکاربهێنێت بۆ سوودوەرگرتن لە سەرچاوەکانی تری وزەی عێراق.
د.سەردار عەزیز مامۆستای زانکۆ لە وڵاتی ئیتاڵیا لە وتووێژی لەگەڵ چاویارنیوز، ڕایگەیاند: پەیوەندی عێراق و تورکیا گۆڕانکاری بەسەردا دێت، ئەوەش هەم لە دەرئەنجامی لاوازی هەندێک وڵاتی ناوچەکەیە، هەم لە بەهێزی خودی تورکیایە، هەم دەرئەنجامی ئەو گۆڕانکارییانەیە لە سوریا ڕوویانداوە.
وتیشی: لەبارەی بوونی بۆڕی نەوتی عێراق لەخاکی تورکیادا، وابیردەکاتەوە بۆرییەکە لەقازانجی عێراقە نەک تورکیا، چونکە لە دووساڵی ڕابردوودا عێراق ئەو بۆرییەی بەکارنەهێناوە و تورکیا هیچ سوودمەند نەبووە لێی، وە تورکیا هەستدەکات گواستنەوە بە بۆری هەرزانە و ئەو گرێبەستەی پێشتر کراوە پێویستی بە پێداچوونەوەیە.
ڕاشیگەیاند: تورکیا دەیەوێت زیاتر سوودمەندبێت لە عێراق، لە بوارەکانی تری وزە و هەروەها بەکارهێنانی کارتی ئاو و ئاسایش و هەموو ئەمانە ڕاستەوخۆ و ناڕاستەوخۆ تێکەڵ بکات.
باسی لەوەشکرد، هەموو ئەو دۆخەی هاتۆتە پێشەوە وادەکات، تورکیا واخۆی دەبینێت کە کارتی زیاتری لەدەستدایە، عێراقیش پێویستی بە تورکیایە لە بواری ئاوداو ناتوانێت فەرامۆشی بکات.