چاویارنیوز _ کاروان یاروەیس ئەندامى ئەنجوومەنى نوێنەرانى عێراق، نامەیەک ئاڕاستەى نووسینگەی عەلی سیستانی مەرجەعی باڵای شیعە دەکات و داوادەکات سیستانی رۆڵ بگێڕێت لە چارەسەرکردنی کێشەی مووچەی هەرێمی کوردستان.
کاروان یاروەیس، لەبارەى نامەکەوە رایگەیاند: مەرجەعی باڵا، لەپاش 2003 هەمیشە رۆڵى لە پرسە چارەنووسازەکان هەبووە و رۆڵی خێر و ئاشتەوایی بینیوە، دەکرێت لەبارەى مووچەوە فەتوایەک بدات وەک پرسێکى مرۆیی.
وتیشی: قسەکانى مەرجەعى باڵاى شیعەکان لاى شیعەکان بە یەکلاکەرەوە دادەنرێت، ئەگەر چارەسەرى تەواویش بۆ دۆخى مووچە نەکات، بەڵام کاریگەرى دەبێت لەسەر حکومەتى عێراق کە حکومەتێکى شیعە مەزهەب ئیدارەى حکومەت دەدات.
ئەو ئەندامەى ئەنجوومەنى نوێنەرانى عێراق، جەختى لەوەشکردەوە، چاوەڕێدەکات وەڵامى نامەکەی بە نووسراوێک بدەنەوە یاخود لەرێگەى فەتوایەکەوە باسی مووچەی هەرێمی کوردستان بکەن.
یاروەیس باسى لەوەشکرد، پرسى مووچە بەستراوەتەوە بە دەستپێکردنەوەى هەناردەى نەوت و داهاتى نانەوتی، کە تەواو بووەتە پرسێکى سیاسیی، بەڵام پێویستە کێشەى مووچە و قوتى هاونیشتمانیان و مووچەخۆران چارەسەر بکرێت.
ئەمە لەکاتێکدایە، بڕیارە شاندێکى هەرێمى کوردستان لە سەرەتاى ئەم هەفتەیەدا سەردانى بەغداد بکات، بۆ یەکلاکردنەوەى پرسى داهاتى نانەوتی و هەناردەکردنەوەى نەوت.
No Comment! Be the first one.