بەغدا داواکاری نوێی هەیە

چاویارنیوز _ مەسرور بارزانی، سەرۆكی حكومەتی هەرێمی كوردستان، لە ڕێوڕەسمی كردنەوەی بەشی یەكەمی پڕۆژەی فریاگوزاریی خێرای ئاوی هەولێر، ڕایگەیاند: بە ڕاشكاوی، ئێمە كیانێكی فیدراڵین و مافی خۆیەتی بودجەی تایبەتیی خۆی هەبێ، كەواتە لە بودجەی گشتیی عێراق، دەبوو بەشی كوردستان تەرخان بكرێ و دامودەزگاكانی هەرێم و خەڵكی هەرێم ئەو كاتە بڕیار لەسەر چۆنیەتی بەكارهێنانی بودجەكە بدەن.
وتیشی: هەر لایەنی ناوخۆیی، سكاڵایان كرد بەغداد ڕاستەوخۆ دەست وەربداتە ناو كاروباری بودجە و مووچەی هەرێم، لە چەندان بۆنە باسیان كرد كە گەر مووچە بچێتەوە سەر بەغدا، كێشەی مووچە نامێنێ، ئەوكاتەی حكوومەتی هەرێمیان تاوانبار كرد، ئێستە ئەو دەنگانە نازانم لە كوێن و بۆ بێدەنگن؟ ئێستەیش پاساو بۆ دواخستنی مووچە لەلایەن حكوومەتی عێراقەوە دەهێننەوە.
ڕاشیگەیاند: ئێمە لەسەر مووچە لەگەڵ بەغداد ڕێككەوتووین، دوای دوو مانگ، جارێكی دیكە پاساوی نوێیان دۆزیوەتەوە و دیسان دەستمان بە ناردنی شاند و دانوستان كردووەتەوە.
مەسرور بارزانی دەشڵێت: بەغداد داوا دەکات نەوتەکە وەربگرێت ئینجا مووچە دەنێرێت لەکاتێکدا هێرش کراوەتە سەر کێڵگەکانمان و بەرهەمی نەوت کەمبوەتەوە ئێستا ئەوەنە بەرهەمنایەت کە لەسەری رێککەوتوین.