چاویارنیوز _ عەلی نزار شەتری بەڕێوەبەری گشتیی کۆمپانیای بەبازاڕکردنی نەوت (سۆمۆ) دەڵێت: تەواوی بەرهەمی نەوتی هەرێم لە سەرجەم كێڵگەكان دەخرێتە ناو چوارچێوەی هەناردەكردن و بەکارهێنانی ناوخۆوە و بڕی بەرهەمهێنانی نەوتی هەرێم لە پشکی ئۆپێکی عێراقدا جێگیرکراوە، هەربۆیە جیاوازییەکە کەم دەبێت، بەو پێیەی لە بەکارهێنانی ناوخۆییەوە گواستراوەتەوە بۆ هەناردەکردن لەڕێگەی سۆمۆوە.
وتیشی: بەکارهێنانی نەوت لە ناوخۆدا نزیکەی (50)هەزار بەرمیلە لە رۆژێکدا، لەکاتێکدا قەبارەی هەناردەکردنی ئێستا نزیکەی (190)هەزار بەرمیلە لە رۆژێکدا. بەڵام ئەگەری زیادبونی هەیە لەگەڵ بەردەوامبونی پرۆسەی هەناردەکردن، چونکە وەبەرهێنان لەلایەن کۆمپانیا بەرهەمهێنەرەکانەوە دەست بە زیادبوون دەکات، بەمەش قەبارەی هەناردەکردن زیاد دەکات.
باسی لەوەشکردووە، رێککەوتنی نەوت بۆ ئەو کۆمپانیایە بیانییانەی کە لە هەرێم کاردەکەن ئاسان نەبوو، بەڵام لەسەر بنەمایەکی پتەوی پیشەیی و تەکنیکی ئەنجامدرا، ئەو کۆمپانیایانە جیهانین و پشت بە سیستمێكی بەرهەمهێنان و حیسابکردنی تێچوون و داهاتی ورد دەبەستن، بۆیە دانوستانەکان لەگەڵیان بە وردی بەڕێوەچوو، قەناعەتیان پێكرا لەڕێی چوونە ناو وردەکارییە و داڕشتنی رێککەوتنەکە وشە بە وشە، بەجۆرێك مافی ئەو کۆمپانیایانە و مافەکانی حکومەتی فیدراڵی و مافەکانی حکومەتی هەرێمی کوردستان زامن بكات.
ئاماژەی بەوەشکردووە، لە رێککەوتنی سێ قۆڵی نێوان بەغداد و هەولێر و کۆمپانیا بیانییەکان، بە هیچ شێوەیەک باسی ئەوەی تیادانییە حکومەتی فیدراڵی قەرزی ئەو کۆمپانیایانە لەلای حکومەتی هەرێمە لە ئەستۆ بگرێت. ئەوەی رێککەوتنی لەسەر کراوە، ئەوەیە کە لە یاسای بودجەی ساڵانی 2023 و 2024 و 2025دا هاتووە، هەروەها هەموارکردنەوەی یاساکە بۆ ساڵی 2025.
بەڕێوەبەری سۆمۆ باس لە قەرزی کۆمپانیاکان دەکات لەلای هەرێم
بەڕێوەبەری گشتیی کۆمپانیای سۆمۆ ڕایدەگەیەنێت لە ڕێککەوتنەکەی نێوان هەرێم و بەغدادا، ڕێککەوتن لەسەر ئەوە نەکراوە بەغداد قەرزی كۆمپانیاكان کە لەلای حكومەتی هەرێمە بگرێتە ئەستۆی خۆی.
No Comment! Be the first one.