دوو ساڵ بەسەر هێرشەکەی تورکیا بۆسەر فڕۆکەخانەی عەربەت تێپەڕ دەبێت

چاویارنیوز _ لەبارەی هێرشەکەوە، بەڕێوەبەرایەتی گشتیی دژەتیرۆری کوردستان، ڕایگەیاند، لێکۆڵینەوەی ورد لەسەر ئەم تاوانە تیرۆریستییە دەست پێ کردووە، کە بە چاوساغی نۆکەرانی بێگانە و سیخوڕانی ناوخۆیی ئەنجام دراوە، بە بێ سزا تێناپەڕێت، تۆڵەی شەهیدەکانمان لە ئەستۆی ئێمەیە و ناهێڵین خوێنی گەشیان بە هەدەر بڕوات.
هاوکات دەوڵەتی تورك لە ڕێگەی وەزارەتی دەرەوەوە ئاشکرای کرد، کە ئەوان ئەو کردەوە تیرۆرستییەیان ئەنجامداوە، هاوکات سەرۆکایەتی کۆماری عێراق بانگهێشتی باڵوێزی تورکیای کرد بۆ ئەوەی نامەی ناڕەزایی و هۆشداری پێبدات، هەر لەو چوارچێوەیەدا، ئەمریکا، بەریتانیا، فەرەنسا و هێزەکانی سووریای دیموکراتیک-قەسەدە ،زۆرێک لە وڵاتانی دیکەی جیهان سەرکۆنەی ئەو هێرشەی دەوڵەتی توركیان کرد بۆسەر فڕۆکەخانەی عەربەت.
هەرچەندە دوو ساڵ تێپەڕیووە بەسەر ئەو کردەوە تیرۆرستییەی دەوڵەتی توركدا بۆسەر فڕۆکەخانەی کشتوکاڵی عەربەت کە تێیدا سێ ئەندامی سەر بە هێزەکانی دژەتیرۆر شەهیدبون و سێ پێشمەرگەی دیکەش برینداربوون، تا ئێستا حکومەتی كاربەڕێكەری هەرێم و عێراق هیچ پەرچەکردارێکیان نەبووە، هەروەها هیچ داوای لێبووردنێکیش لە لایەن دەوڵەتی توركەوە ئاراستەی حکومەتی عێراق و هەرێم نەکراوە.
جێگای ئاماژەیە، لە سەروبەندی هێرشەکەی دەوڵەتی توركدا بۆسەر فڕۆکەخانەی کشتوکاڵی عەربەت، حکومەتی كاربەڕێكەری هەرێم و پەدەکە وەک پیشەی هەمیشەیی خۆیان لە ڕێگەی بەیاننامە و ڕاگەیاندنەکانیانەوە ڕەوایەتیان دا بەو هێرشەی دەوڵەتی تورک بۆسەر سنووری سلێمانی.