چاویارنیوز – میدیای ئێرانی بەشێک لە بەڵگەنامە زۆر نهێنییەکانی ئیسرائیل کە لەلایەن هێزە ئەمنییەکانی کۆماری ئیسلامییەوە بۆ ئێران گوازراونەتەوە، ئاشکرا کرد کە جگە لە بەڵگەنامەی ئەتۆمی، زانیاریی لەسەر دەستوپێوەندەکان و گرووپە بەکرێگیراوەکانی ڕژێمی زایۆنی دژبەری ئێرانی تێدایە.
کەناڵێکی کوردی زمانی ئێران بە ناوی سەحەر لە بەرنامەیێکی تایبەتدا کە سێشەممەشەو بڵاوکرایەوە، بەپشت بەستن بە بەڵگە زۆرنهێنییەکانی ئیسرائیل کە دەستی هێزە ئەمنی و ئیتڵاعاتییەکانی ئێرانی پێڕاگەیشتووە، پێوەندیی کۆمەڵە و دیموکرات وەک دوو هێزی دژبەری ئێران و ئەژی ئەمین سەرۆکى ئاژانسى پاراستن و زانیارى/زانیارى لەگەڵ ئیسرائیل ئاشکرا دەکات.
لەم ڕاپۆرتەدا ئاماژە بەوە کراوە کە گرووپەکانی دژبەری ئێران لەوانە کۆمەڵە و دیموکرات بە تەواوەتی بوونەتە بەکرێگیراوی ئیسرائیل.
هەموو بەڵگە و دێکۆمێنتەکان لەبارەی پێوەندیی کۆمەڵە و دیموکرات و ئەژی ئەمین لەگەڵ ئیسرائیل لە ئێستادا لەدەستی ئێران دایە.
لە بەڵگەنامەکاندا هاتووە: عەبدوڵڵا موهەتدی سکرتێری کۆمەڵە ڕێکەوتنێکی ٥ ملیۆن یۆرۆیی لەگەڵ ئیسرائیل بەستووە بۆ ئەوەی ١٠ ئەندامی کۆمەڵە بخرێنە خزمەتی ئیسرائیل بە ئامانجی ئەنجامدانی کردەوەی تیرۆریستی لە ناو ئێران.
هەوڵدان بۆ کردەوەی تێکدەرانە و تەقینەوە لە داومەزراوەی پیشەیی ئیسفەهان، هەوڵدان بۆ هێرش بۆ سەر دامەزراوە ئەتۆمییەکانی ئێران، هاوکاریی لە تیرۆری زانایان و ئەنجامدانی چەندین کاری تێکدەرانەی دیکە بەشێک لەم ڕێککەوتنە بووە.
هەروەها لە بەشێکی ئەم ڕاپۆرتەدا وێنەیێکی مستەفا هیجری سکرتێری دیموکرات و شاهۆ حسێنی بەرپرسی پێوەندییەکانی دیموکرات لە قودس بڵاوکراوەتەوە.
هەروەها زانیاریی لەسەر پێوەندیی خالد عەزیزی سکرتێری پێشووی دیموکرات لە ڕێگەی کەسێک بە ناوی مەولوود ئافەند لەگەڵ ئیسرائیل ئاشکرا کراوە.
لە بەشێکی دیکەی ئەم ڕاپۆرتەدا ئاماژە بە ڕۆڵی ئەژی ئەمین و ناپاکییەکانی ئەو و پێوەندییەکانی لەگەڵ ئیسرائیل کراوە.
No Comment! Be the first one.