چاویارنیوز ـ چیا هاوار نووسەر و برازای نیاز دەرگەڵەیی کە دوو ساڵ پێش ئێستا لە باخەکەی خۆیدا تیرۆرکرا، لە وتارێکدا کە ئەمەی خوارەوە دەقەکەیەتی، دەنووسێت:
مێژووی تیرۆر لە كوردستان هێندە دوور و درێژ و قێزەونە كە مرۆڤ ئارەزوومەند نیە ئەو مێژووە بخوێنێتەوە چونكە لەگەڵ هەر دێڕێكدا وێنەی مێژووی تیرۆری تێكۆشەرێك یان بنەماڵەیەك بەدی دەكرێت، نامەوێ قووڵ بمەوە لە مێژوو بەڵام گرنگیشە ئاوڕێك بدەینەوە و بپرسین لە باشووری كوردستان چی گوزەراوە، ئەو هەموو خەڵكە بۆ تیرۆر كرا و ئامانج لەو تیرۆرانە چی بووە و كێ كردوویەتی.
مۆدێلی تیرۆری سیاسی لەسەر دەستی پارتی بەناو دیموكراتی كوردستان و بە بڕیار و سەرپەرشتی خودی بنەماڵەی بارزانی ئەنجامدراوە.
لە مێژووی نزیكدا وا تۆمار كراوە كە لە 15ی گوڵانی 1968( سلێمان موعینی و خەلیل شەوباش) بە فەرمانی مەلا مستەفا بارزانی گوللەباران كران و تەرمەكەیان رادەستی رژێمی شای ئێران كرانەوە، سلێمان موعینی و خەلیل شەوباش دوو سەركردە و فەرماندەی لێهاتوو و قارەمانی رۆژهەڵاتی كوردستان بوون و تەنها لەبەر ئەوە تیرۆركران كە ئامادە نەبوون خۆیان رادەستی رژێمی شا بكەن و داوای لێبوردن بكەن كە ئەمە داخوازی مەلا مستەفا بووە و ئەو دوو تێكۆشەرە رەتیان كردۆتەوە.
بنەماڵەی حەمەد ئاغای مێرگەسۆر هەر بە فەرمانی خودی مەلامستەفا بارزانی تێكڕایان گوللە بارانكران و تا ئێستاش روون نیە كە بە چ تۆمەتێك و بە چ بڕیارێكی یاسایی ئەو تاوانە گەورەیان دەرهەق بەو بنەماڵە شۆڕشگێڕ و تێكۆشەرە ئەنجامدا، لە رۆژێكدا ئەو بنەماڵەیە كۆمەڵكوژكران كە بڕیاری ئاشبەتاڵ درابوو و زۆرینەی خەڵكی كوردستان خاكی وڵاتیان بەرەو ئێران جێهێشتبوو ئا لەو رۆژەدا حەمەد ئاغا و كوڕەكانی كۆمەڵكوژ كران.
پارتی بە درێژایی حەفتاونۆ ساڵی تەمەنی مێژووەكەی پڕ پڕە لە تیرۆر و كوشتن و تۆقاندن.
مێژووی ئەو حزبە تەژییە لە ناوی ئەو تێكۆشەر و نووسەر و رۆژنامەنووسانەی كە ئامادەنەبوون سەر بۆ بنەماڵەی بارزانی دانوێنن، تیرۆریان كردوون و سڕیویاننەتەوە.
لە دوای راپەڕین، بەدەیان كەسایەتی وەك (فرانسیس یوسف شابۆ، هاوڕێ رێناسی زەحمەتكێشان، رەؤوف ئاکرەیی، د.نازدار بامەڕنی، م.شاخەوان مەلا مەجید گوێڕی و دكتۆر چیای پێشمەرگە) و دەیان تێكۆشەری تر بە بڕیاری بنەماڵەی بارزانی تیرۆر كران و لەناوبران.
لەم دوواییانەش (سەردەشت عوسمان، عەبدولستار مەجید، سۆرانی مامە حەمە، ویداد، مامۆستا جیهان و دەیانی تر) لەسەر دەستی ئەو پارتە تیرۆركران.
بێگومان لە بابەتێكی ئاوادا ناكرێ ئاماژە بە كۆی ئەو كردەوە تیرۆریستیانە بدەین، لێ دەمەوێ لە دووەم ساڵیادی تیرۆركردنی شەهید (نیاز دەرگەڵەیی) مامم ئەو راستیە بڵێم كە شەهید نیاز دەرگەڵەیی لە ریزبەندی ئەو زنجیرە تیرۆرە هەژمار دەكرێت كە خودی پارتی و بە فەرمانی بنەماڵەی بارزانی ئەنجامدران.
نیاز دەرگەڵەیی یەكێك بوو لەو پێشمەرگە دێرینە دانەبڕاوانەی یەكێتی كە لە سەردەمی لاوێتی و لە تەمەنێكی زۆر بچووكدا چۆتە ناو ڕێکخستنەکانی کۆمەڵەی ڕەنجدەران و دواییش پێشمەرگە لە ڕیزەکانی یەكێتی نیشتمانی كوردستان. شەهید نیاز و شەهیدان خەبات دەرگەڵەیی و شەهید مەولان دەرگەڵەیی ناوی درەوشاوەی شۆڕش و پێشمەرگایەتی بوون لە دەڤەری باڵەكایەتی و سەرتاسەری كوردستان، مێژوو شاهێدە كە لەسەرەتای هەشتاكانی سەدەی رابردوو تا راپەڕینی بەهاری 1991 هیچ داستان و شەڕێكی بەرگری لە سەرتاسەری باشوری كوردستان بەبێ ناوی ئەو سێ پێشمەرگە قارەمانە نانوسرێتەوە. بەداخەوە لە دوای راپەڕین و لەکۆڕەوەکە كاك خەبات شەهید بوو و دووای ماوەیەكی كورت لە شەهیدبوونی كاك خەبات، كاك مەولانیش شەهید بوو، لە دووای شەهید بوونی ئەو دوو تێكۆشەرە شەهید نیاز وەك پێشمەرگەیەكی دێرین و خاوەن ئەزموون، لە نێو سوپای یەكگرتووی ئەوسا چەندین پلەی سەربازی بڕی، لە شەڕەكانی ناخۆ شەهید نیاز لە میحوەری وەرتێ و پێشتریش لە میحوەری دەرگەڵە و زینووی ماویلیان بەرپرس بووە، هیچ كاتێك بەرپرسی میحوەری باڵەكایەتی و قەسرێ نەبووە، لەیەكێك لە شەڕەكاندا لە شاخی مامەڕوت چەند بارزانیەك كوژران، ئا لەو كاتەدا شەهید نیاز بە شاهێدی خەڵكی ناوچەكە و هاوڕێ و هاوسەنگەرەكانی لە گوندەكەی خۆی دەرگەڵە بووە و هیچ پەیوەندییەكی بەو شەڕەوە نەبووە و بگرە 30 بۆ 40 كیلۆمەتر لەو ناوچەیەش دوور بووە، لەو ساوە تا رۆژی تیرۆركرانی شەهید نیاز لە لایەن خودی مەسعود بارزانی و پارتی تاوانبار كراوە بە كوژرانی ئەو بارزانیانەی شاخی مامەڕووت و بەو هۆیەشەوە چەندین جار هەوڵی تیرۆركردنی دراوە بە شێوازی جۆراوجۆر. سەرەتای ساڵی 2023 مەسعود بارزانی كتێبێكی بڵاو كردەوە و لە لاپەڕە 295 دا ناوی شەهید نیاز وەك خائینێك ئاماژە پێدەدات، دووای بڵاوبوونەوەی ئەو كتێبەی مەسعود بارزانی، ئێمە ترسی ئەوەمان هەبوو كە پارتی كردەوەیەك دژ بە شەهید نیاز ئەنجام بدات، هەر بۆیە بەشێكی زۆری كەسە نزیكەكانی بەردەوام داوایان لێدەكرد كە زیاتر ئاگاداری بارودۆخی ئەمنی خۆی بێت، لەراستیدا بەشێكمان پێمان وابوو ئەو شێوازە نووسینەی مەسعود بارزانی دەركردنی فەتوای كوشتنی شەهید نیاز بوو، ئەوەبوو رۆژی 18/8/2023 پارتی سێ لە پیاوكوژەكانی لە سۆران و هەولێرەوە دەنێرێتە شاری رانیە، تیرۆریستەكان لە دەشتی كۆیەوە دزەدەكەن و بەنێو كۆیە و هەیبەت سوڵتان و لەوێشەوە بۆ گوندی جەلی و دوواتر بۆ گوندی قەمتەران و هەر بە دەشتاییەكاندا خۆیان دەگەیەننە چوارقوڕنە و نزیك باخەكەی شەهید نیاز، دووای تاریكبوون و چاودێرییەكی ورد خۆیان دەخزێننە نێو باخەكەی و دەرفەت دێنن و لە نێو ماڵەكەی خۆی بە سێ گوللە تیرۆری دەكەن. تیرۆریستەكان هەر بەو رێگەیەدا دەگەڕێنەوە، ئەو تیرۆریستانە بە پێی نەخشەیەكی ئەمنی دیراسەكراوی زۆر ورد لە هەولێرەوە خۆیان دەگەیەننە چوارقوڕنە و دەگەڕێنەوە بە شێوەیەك تێكڕای بازگەكانی ئەو سنوورە بە ئاسانتریشن شێوە باز دەدەن و تەنانەت سوتەمەنی زیادەشیان پێیە بۆ ئەوەی ناچار نەبن بچنە هیچ بەنزینخانەیەك.
دەزگا ئەمنیەكانی ئەم ناوچەیە هەر زوو گەیشتنە ئەنجام و بەڵگەی زۆریان كۆكردەوە لەسەر چۆنیەتی تیرۆركردنەكە، چەندین بەڵگەیان نیشانی ئێمەدا و لە راستیشدا بەڵگەكان حاشاهەڵنەگر بوون و گومانێكیان نەهێشتبۆوە بۆ سەلماندنی رووداوەكە.
ئەوەی جێی داخ و نیگەرانیە بۆ تاك بە تاكی بنەماڵەی شەهید نیاز دەرگەڵەیی و كەس و كار و هاوڕێ و هاوسەنگەرانی، بێدەنگی و بێ هەڵوێستی حزبەكەی خۆیەتی، كە دوو ساڵ بەسەر رووداوەكەدا تێدەپەڕێت و تا ئێستا بە روونی نەهاتن بۆ رای گشتی روون بكەنەوە كە كێ ئەنجامدەری ئەو كردەوە نامرۆڤانە و دوور لە هەموو بەها مرۆییەكان بووە، تا ئێستاش بنەماڵەی شەهید نیاز لە هیچ هەنگاوێكی یاسایی ئاگادار نییە كە یەكێتی گرتبێتیەبەر، لەكاتێكدا بەرپرسە باڵاكانی یەكێتی بەرەسمی داوایان لە بنەماڵەی شەهید نیازكرد كە دان بەخۆیاندا بگرن و ئەو كەیسە بۆ خودی یەكێتی جێبێڵن چونكە كەیسەكە تەواو سیاسیە و ئەوە یەكێتیە كە دەبێت بچێتە ژێرباری، بەڵام تا ئەمڕۆ كە دووەم ساڵیادی تیرۆركردنی شەهید نیاز دەرگەڵەییە یەكێتی بە هیچ شێوەیەك كەسوكار و بنەماڵەكەی لە هیچ هەنگاوێك ئاگادارنەكردۆتەوە، ئەوەش برینی قووڵی لەدەستدانی شەهید نیاز دەیان هێندە قوڵتر و بەژانتر دەكات.
No Comment! Be the first one.