خەڵاتی نوێ ئەدەبی “هیلاری مانتێل” لە بەریتانیا و ئێرلەندا بەڕێوەدەچێت

چاویارنیوز ـــ خەڵاتێکی نوێی ئەدەبی بەناوی “هیلاری مانتێل” بە مەبەستی پشتگیریکردنی نووسەرانی تازەپێگەیشتوو لە وڵاتانی بەریتانیا و ئێرلەندا بەڕێوەدەچێت.

چەند مانگێک دوای کۆچی دوایی “مانتێل” لە ئەیلوولی ٢٠٢٢، ڕۆماننووسی بەناوبانگ “ماگی ئۆفارێل” لە کتێبفرۆشێکدا دەگەڕا، و کتێبێکی بینی کە لە لایەن “هیلاری مانتێل”ـەوە پەسەند کرابوو. ناوبراو وتی: “بەگشتی، ئەو واژۆیە بۆ من تەواوە بۆ ئەوەی پاساو بۆ نرخی کتێبەکە بهێنمەوە، بەڵام ئەمجارەیان لەناکاو بیرم لەوە کردەوە، ‘هەرگیز جارێکی تر ساتێکی دیکەی لەو شێوەیەمان نابێتەوە، ساتێکی زۆر دڵتەزێن بوو؛ ئێمە هەرگیز کتێبێکی دیکە لە مانتێل نابینین و هەرگیز نازانین چ کتێبێکی خوێندووەتەوە و حەزی لە چ کتێبێک بووە.”

بۆ زۆرێک لە خوێنەران کە 17 بەرهەمێ “مانتێل”یان خوێندووەتەوە، لەوانە “ئەوپەڕی تاریکی” و “هۆڵی گورگ” کە دوو جار خەڵاتی بۆکەری بەدەستهێناوە، جێ سەرسوڕمانە کە ئەو نووسەرە بەناوبانگە کاتێکی بۆ پشتگیریکردنی نووسەرانی دیکە داناوە، سەرەڕای لێکۆڵینەوە مێژووییە بەرفراوانەکانی و بەشداریکردنی لە وەرگێڕانی جۆراوجۆردا.
مانتێل لایەنگرێکی بەسۆز و چالاک بوو، بەتایبەتی بۆ ئەو نووسەرانەی کە تازە دەستیان بە نووسین کردبوو، ڕەنگە لەبەر ئەوەی هەرگیز لەبیری نەچووبێت کە یەکەم ڕۆمانی بە ناوی “شوێنێک بۆ سەلامەتی زیاتر” ساڵانێک دوای نووسینەکەی، لە ساڵی ١٩٩٢دا لەچاپ درا.

ناردنی بەرهەم بۆ ڕێوڕەسمی خەڵاتی ئەدەبی هیلاری مانتێل بۆ چیرۆکی خەیاڵی ئەمڕۆ دووشەممە دەستپێدەکات و تا ٣١ی کانوونی دووەمی ٢٠٢٥ بەردەوام دەبێت بەتایبەت بۆ بەرهەمە بڵاونەکراوەکانی نووسەرانی بەریتانیا و ئێرلەندی. ڕێوڕەسمی خەڵاتی یەکەمی ئەدەبی هیلاری مانتێل بۆ تازە نووسەران لە بەهاری ساڵی ٢٠٢٦وە بەملا، بەڕێوەدەچێت.