چاویار نیوز ـــ ساڵانێک لەمەوبەر و زۆر پێش ئەوەی کریستیانۆ ڕۆناڵدۆ ببێتە ئەفسانەی جیهان و پێنج جار براوەی تۆپی زێڕین، لێدوانێکی بوێرانەی لە یانەی مانچستەر یونایتد پێشکەش کرد کە دەرخەری متمانەی باوەڕپێنەکراوی خۆی بەخۆی بوو.
ئیدوین ڤان دێرسار، گۆڵپارێزی هۆڵەندی و هاوڕێی پێشووی ڕۆناڵدۆ لە ئۆڵدترافۆرد، لەم دواییانەدا ئەو ڕۆژانەی بیرهێنایەوە کە لەگەڵ ڕۆناڵدۆ شانبەشان یاری دەکرد، ئەو دەڵێت لە ساڵانی سەرەتای یاریکردنی لەگەڵ یونایتد، ڕۆناڵدۆی لاوە پڕ بووە لە بوێری و ئیرادە و بە دڵنیاییەوە پێی گوتووە: ئێدوین، ڕۆژێک دێت کە من دەبمە باشترین یاریزانی جیهان.
ڤان دێرسار دەڵێت: کریستیانۆ سەرسوڕهێنەر بوو، هەمیشە پێش و دوای مەشق و ڕاهێنانەکان لە هۆڵی وەرزشدا بوو، هەرگیز ئیرادەیەکی وام لە یاریزانێکی گەنجدا نەبینیبوو، پێم دەگوت زیادەڕەوی مەکە، بەڵام ئەو ڕاستی دەکرد.
کات دەریخستووە کە ئەو متمانەیە زۆریش درووست و بەجێگە بوو. ئەمڕۆ ڕۆناڵدۆ نەک هەر پێنج تۆپی ئاڵتونی لەنێو کارنامەی کاری خویدا هەیە، بەڵکو پێنج جار نازناوی چامپیۆنزلیگی بەدەستهێناوە و لە بەرزترین ئاستی تۆپی پێدا نزیکەی ٩٥٠ گۆڵی تۆمارکردووە و دەیان ژمارەی پێوانەیی دیکەی شکاندووە.
لەم ڕۆژانەدا ڕۆناڵدۆ بەردەوامە لە درەوشاوەیی بە درێسی ئەلنەسری سعودییەوە و تینوێتی بێکۆتایی خۆی بۆ تۆپی پێ نیشان دەدات. ئەو و تیپەکەی ڕۆژی چوارشەممە لە قۆناغی یەکەمی جامی ئاسیا بەرامبەر ئیستقلالی تاجیکستان دەچنە یاریگا؛ یارییەک کە هاندەران بە تامەزرۆییەوە چاوەڕێی بینینی ئەستێرە پورتوگالییەکە دەکەن.
متمانەی گەنجێک کە سەردەمانێک لە ژووری جلگۆڕینی یونایتد بەڵێنی پاڵەوانێتی دابوو، ئێستا بووەتە واقیعێکی گەورە لە مێژووی تۆپی پێی جیهاندا.
No Comment! Be the first one.