هاوڕێ نزیکەکەی “ڕۆناڵدۆ” دەیەوێت چاوپێکەوتن لەگەڵ “مێسی”دا بکات

چاویارنیوز ـــ بەرگریکاری پێشووی یانەی مانچستەر یونایتد و یەکێک لە هاوڕێ نزیکەکانی کریستیانۆ ڕۆناڵدۆ، “ڕیۆ فێردیناند، لە چاوپێکەوتنێکدا لەگەڵ ڕۆژنامەی تایمز، پەیوەندییە نزیک و هەندێکجار گاڵتەجاڕانەکانی لەگەڵ ئەستێرە پورتوگالییەکە ئاشکرا کرد.

ناوبڕاو دەڵێت، ئێستا ڕۆناڵدۆ بە گاڵتەجاڕیەوە ناوی دەبات “پەیامنێر” لە گروپی واتسئەپی یاریزانانی پێشووی یونایتد.

فێردیناند و ڕۆناڵدۆ لە نێوان ساڵانی 2003 بۆ 2009 هاوڕێی ئۆڵدترافۆرد بوون و پێکەوە بەشێک بوون لە سەردەمی زێڕینی شەیتانە سوورەکان، بەڵام ئێستا ساڵانێک دوای ئەو ڕۆژانە، ڕێبازی ئەو دوو ئەستێرەیە تەواو جیاوازە. فێردیناند هاتۆتە نێو جیهانی میدیا و پۆدکاستەوە، ڕۆناڵدۆش لە تەمەنی 40 ساڵیدا تا ئێستاش بۆ ئەلنەسر لە سعودیە دەدرەوشێتەوە.

بەگوتەی فێردیناند، ڕۆناڵدۆ نامەیەکی بۆ ناردووە و بە پێکەنینەوە پێ گتووە: “ئیتر ناتوانم زۆر قسە بکەم لەناو گروپەکەدا، چونکە ڕیۆ ڕۆژنامەنووسە!” گاڵتەیەک کە ڕەگ و ڕیشەی لە واقیعدا داکوتاوە، چۆنکە ڕۆناڵدۆش هەمیشە هەستیار بووە بەرامبەر بە وێنەی میدیایی خۆی و وریایە هیچ قسەیەک لە دەستی دەرنەچێت.

ئێستا فێردیناند میوانداری پۆدکاستی بەناوبانگی “ڕیۆ میتس” دەکات و چاوپێکەوتنی لەگەڵ کەسایەتییەکان وەک ستیڤن جیرارد و مایکل ئۆین و هاری ماگوایەر ئەنجامداوە. ناوبراو دەشڵێت، ئامانجی ئەو دروستکردنی فەزای سەلامەتە بۆ یاریزانانی تۆپی پێ بۆ ئەوەی ڕاستەوخۆ باسی ئەزموونەکانیان بکەن، بەڵام هێشتا یەکێک لە خەونە پڕۆفشناڵەکانی بە بەدینەهاتوو دەزانێت، ئەویش قسەکردنە لەگەڵ “لیۆنێل مێسیی”. فێردیناند لە کۆتاییدا وتی: مێسی تاکە کەسە کە دەتوانێت بە دڵنیاییەوە بڵێت کە لە کریستیانۆ باشترە، منیش پێم خۆشە ئەو قسەیە لەسەر زاری خۆیەوە ببیستم.