“سەردەمی زێڕین” خەڵاتی قەلعەنۆیی بۆ ئۆزبەکەکان

چاویارنیوز ـــ میدیاکانی ئۆزبەکستان پاش سەرکەفتن بەرانبەر هەڵبژاردەی ئێران ئاهەنگی نیشتمانی دەگێڕن.

دەزگاکانی ڕاگەیاندنی zamin.uz و uzdaily.uz و gazeta.uz ئۆزبەکستان ئەمڕۆ سێشەممە سەرکەوتنی هەڵبژاردەکەیان بەسەر ئێران بە دەستکەوتێکی مێژوویی و دراماتیک وەسفکرد. ئۆزبەکستان توانی 13 ساڵ نەدۆڕاوی ئێران بشکێنێت لەژێر سەرپەرشتی “قەلعەنۆیی”دا.

هەڵبژاردەی ئێران شەوی ڕابردوو لە یاری کۆتایی CAFA ڕووبەڕووی ئۆزبەکستان بووەوە و لە خولەکی 5 بەهۆی کارتی سووری ئاریا یوسفی بۆ 10 یاریزان کەمکرایەوە. یارییەکە چوو بۆ کاتی زیادکراو، بەڵام بەرگری یاریزانانی ئێرانی لە خولەکی 120 شکا و بووە هۆی تۆمارکردنی گۆڵێک لە بەرامبەریان و لە ئاکامدا بە ئەنجامی 1-0 دۆڕان.

تەلیسمی 13 ساڵ سەرکەفتنی ئێران بەرانبەر بە ئۆزبەکستان شکا

ماڵپەڕی gazeta.uz ئۆزبەکستان بە خۆشحاڵییەوە ئەم سەرکەوتنەی ڕاگەیاند و گوتی دواجار ڕیکۆردی نەبەزینی ئێران شکێنرا و هەڵبژاردەی نیشتمانی توانی ببێتە پاڵەوانی کافا. ماڵپەڕی sentiment ئۆزبەکستانیش ئەم سەرکەوتنەی بە یارییەکی مەزن وەسف کرد کە سەرەتای سەردەمی زێڕینی یاریزانانی ئۆزبەکستان بوو کە دوای چەندین ساڵ ئێرانیان بردەوە.