ئەمریکا باشترین ناوبژیوانی ئەفریقا دیپۆرت دەکاتەوە

چاویارنیوز _ “عومەر عەبدولقادر ئارتان” باشترین ناوبژیوانی سۆماڵی بە مەبەستی بەشداری لە مۆندیالدا گەیشتە ئەمریکا، بەڵام دەستبەجێ دیپۆرت کرایەوە.

لە کاتێکدا کە ڕۆژی پێنجشەممە مۆندیالی ٢٠٢٦ دەست پێدەکات، دەنگۆی هاتنە ناوەوەی بەشێک لە هۆکار و کەسایەتییەکانی پەیوەست بەو کێبڕکێیە بۆ ناو ئەمریکا هێشتا بەردەوامە؛ پرسێک کە جارێکی دیکە شێوازی مامەڵەکردنی بەرپرسانی ئەمریکی لەگەڵ میوانانی مۆندیالی خستۆتە ژێر پرسیارەوە.
لە دوایین حاڵەتدا، ڕاپۆرتەکان ئاماژە بەوە دەکەن کە “عومەر عەبدولقادر ئارتان” ناوبژیوانی دیاری سۆماڵی و یەکێک لە ناوبژیوانە دیارەکانی کیشوەری ئەفریقا، دوای چەند مانگ چاوەڕێی بۆ وەرگرتنی ڤیزە، لەلایەن دەسەڵاتدارانی کۆچبەرانەوە ڕەتکرایەوە بچێتە ئەمریکا و ناردیانەوە بۆ تورکیا.
تا ئێستا هیچ ڕوونکردنەوەیەکی فەرمی سەبارەت بە هۆکاری ئەم کارە نەدراوە و وردەکارییەکانی ڕووداوەکەش هێشتا بە نهێنی ماوەتەوە. ئەم ڕووداوە لە کاتێکدا ڕوویدا کە ئارتان پێشتر لە پەیجی تایبەتی خۆی هەڵوێستی لەسەر کوشتنی موسڵمانان لە سۆماڵدا هەبووە.
ئەمە یەکەم پرس نییە کە پەیوەندی بە مۆندیالی ٢٠٢٦ەوە هەبێت. چەند ڕۆژێک لەمەوبەر “تەلال سەڵاح”، فۆتۆگرافەرێکی عێراقی کە بۆ ڕووماڵکردنی پاڵەوانێتییەکە گەشتی بۆ ئەمریکا کردبوو، لەگەڵ گەیشتنی بە فڕۆکەخانە لەلایەن پۆلیسەوە دەستگیرکرا و دواجار دیپۆرتکرایەوە؛ ڕووداوێک کە لە میدیا عەرەبییەکاندا کاردانەوەی زۆری بەدوای خۆیدا هێنا.
هەروەها “ئیمەن حسێن”، هێرشبەری بەناوبانگی هەڵبژاردەی عێراق، لەکاتی هاتنە ناوەوەی بۆ ئەمەریکا تووشی کێشەی کۆنتڕۆڵکردنی پاسپۆرت بووەوە و بۆ چەند کاتژمێرێک لە فڕۆکەخانە لێپرسینەوە و پشکنینی ئاسایشی بۆ کرا. هەرچەندە لە کۆتاییدا ڕێگەی پێدرا بچێتە ئەمریکا، بەڵام ڕووداوەکە بە شێوەیەکی بەرفراوان لە میدیاکانی ناوچەکەدا ڕووماڵ کرا.
هەموو ئەم ڕووداوانە نیگەرانییان لەبارەی مامەڵەکردن لەگەڵ وەرزشوانان و ناوبژیوانان و چالاکانی میدیایی وڵاتانی جیاواز لە سەروبەندی دەستپێکردنی گەورەترین مۆندیال لە مێژوودا دروستکردووە. ئەو پرسانەی کە دەتوانن جارێکی دیکە مشتومڕ سەبارەت بە سیاسەتەکانی  ئەمریکا لە کاتی مۆندیالدا بخەنە بەرچاو.