بەداخەوەم کەریم سنجاری زۆر زوو مرد!

چاویارنیوز _ دوای ئەوەی دوێنێ کەریم شنگالی وەزیری پێشووی ناوخۆی حکومەتی هەرێم کۆچی دوایی کرد، هاووڵاتیان و نووسەران و سیاسییەکان بۆچوونی جیاوازیان هەیە لەبارەیەوە.
چیا هاوار نووسەر لەباشووری کوردستان لە وتارێکدا ڕایگەیاند:
کەریم سنجاری ئەو کەسەیە کە لەکۆتایی نەوەدەکانی سەدەی رابردوو بەرپرسی دەزگای پاراستن بوو و تێکڕای زیندانە شاراوە و نایاساییەکانی پارتی لەژێر دەسەڵاتی ئەودا بوون، زیندانەکانی (ژێرزەمینی پاراستن لە مەسیف، ئاسایشی مەسیف، شەقڵاوە، ئاسایشی گشتی – هەولێر، ئاسایشی هەولێر، زیندانی لقی ٤ی سلێمانی لەهەولێر، زیندانی لقی ١١ی پارتی لەهەولێر، زیندانی پاراستن لە شەقڵاوە، زیندانی پاراستن لە سۆران، زیندانی ئاکرێ، زیندانی دهۆک، زیندانی زاخۆ و زیندانی سەرسەنگ) بێگومانم کە زیندانی تریش بوونی هەبوو.
وتیشی: من یەکێک بووم لەو کەسانەی رۆژی ١٩٩٧/٧/١٨ لە وڵاتی تورکیا دیپۆرت کرامەوەو لەلایەن پاراستنی پارتییەوە دەستگیر کرام و جگە لە زیندانی سەرسەنگ و شەقڵاوە تێکڕای ئەو زیندانەنەی ترم بینی بێ ئەوەی دادگایەک یاخود دادوەرێک ببینم.
ڕاشیگەیاند: بەدرێژایی ١٤ مانگ، هەر لە رۆژی دەستگیرکردنم تا رۆژی ئازادبوونم لەژێر ئەشکەنجەیەکی کەم وێنە دابووم و ئەوەی لە زیندانەکانی بەعس بەخەڵک نەکرابێت لە زیندانەکانی پاراستن بە فەرمانی راستەوخۆی کەریم سنجاری ئەوەی خوا پێی ناخۆشە بەرامبەر من و هەزاران زیندانی تری بێتاوان کردیان.
باسی لەوەشکرد: لە زیندانی پاراستن لە مەسیف صڵاحەدین، بە چاودێری خودی کەریم سنجاری ٢٩ شەو لەژێر ئەشکەنجە و ژووری تاکەکەسیدابووم، لێرە نایەمە سەر تێکڕای بەسەرهاتەکان چونکە پێشتر لە دووتوێی کتێبێک بەناوی (ئازادبوون لەدەریا، نوقومبوون لەزیندان) تێکڕای بەسەرهاتی زیندانە تاریکەکانی پارتی و کەریم سنجاریم بڵاو کردۆتەوە.
ئاماژەی بەوەشکردووە: ماوەتەوە بڵێم لەبەرامبەر ئەو هەموو غەدرە و لە هەمبەر ئەو هەموو پێشێلکارییەی کەریم سنجاری جەلاد بەرامبەر مرۆڤایەتی کردی، زۆر زوو مرد و گیانی لەدەستدا، ئەزانم ساڵانێکە بەدەم ئازاری شێرپەنجەوە ئەناڵێنێت، ئەوەش نزای ئەو هەزاران دایکە جگەر سوتاوانەیە کە بەفەرمانی ئەو سەدان کەس بێ سەروشوێن و ئەشکەنجە و کەم ئەندام کران، نزای ئەو هەموو زیندانییە بێتاوانانەبوو وای لە کەریم کرد کەشەو و ڕۆژ ئەشکەنجە ئەدران و هەڵدەواسران.
دەڵێت : خودا حەقی کەس بەسەر کەسەوە ناهێڵێ بەڵام خۆزگە چەند ساڵێکی تریش کەریم سنجاری بەدەم ئازارەوە ژیابا و هێندەی تر رەزیل ئەبوو، خوای گەورە ئەفەرموێ(وَمَا ظَلَمُونَا وَلَـكِن كَانُوا أَنفُسَهُمْ يَظْلِمُونَ) بەڵێ ئەوان زوڵمیان لەخۆیانکرد نەمردین تا بینیمان چیان بەسەرهات.