چاویارنیوز ـــ زیاتر لە 300 نووسەر لە سەرانسەری جیهانەوە ڕایانگەیاند، تا ئەوکاتەی کەوا نیویۆرک تایمز بەردەوام بێت لە پشتیوانیکردنی جینۆساید لە کەرتی غەززەدا، کارکردن لەگەڵیدا ڕادەگرن.
ئەو یەکدەنگییەی کە لە نێوان نووسەران و شاعیران و هونەرمەندان و وەرزشوانان لە سەرانسەری جیهاندا بۆ پشتیوانی و بەرگریکردن لە مافە ڕەواکانی گەلی فەلەستین لە دوای هێرشە دڕندەکانی ڕژێمی زایۆنی بۆ سەر غەززە لە ماوەی دوو ساڵی ڕابردوودا سەریهەڵدا، ئەزموونێکی نوێ بوو، ئەزموونێک کە سەرەڕای ئاگربەستە ناسکەکەی نێوان هەردوولا بەردەوامە.
لە نوێترین هەنگاو لەم بوارەدا، زیاتر لە 300 نووسەر و توێژەر و ڕۆشنبیر لە سەرانسەری جیهانەوە بەڵێنیان داوە لە بەشی “ڕا و بۆچوونەکان”ی ڕۆژنامەی نیویۆرک تایمزدا هیچ بابەتێکیان لێ بڵاونەکەنەوە تا ئەو کاتەی کە داواکارییەکانیان جێبەجێ دەکرێت.
نووسەران و توێژەران ڕەخنەیان لە بۆچوونی ڕۆژنامەکە گرتووە لە شەڕی ئیسرائیل دژی خەڵکی غەززە و پێیان وایە بەرپرسەکانی میدیاکە لایەنگری ئیسرائیلیان کردووە و لەم شەڕەدا ڕاستییەکانیان شاردوەتەوە بەبێ ئەوەی لەبەرچاو بگرن.
نووسەران ڕایانگەیاندووە، ڕەتیدەکەنەوە هاوکاری بەشی ڕا و بۆچوونەکانی میدیاکە بکەن تا ئەوکاتەی “بەرپرسیارێتی لە ڕووماڵکردنی لایەنگری خۆی قبوڵ دەکات و پابەند دەبێت بە ڕاپۆرتکردنی ڕاستی و ئەخلاقی لەسەر شەڕی ئەمریکا و ئیسرائیل بۆ سەر غەززە”.
پشتیوانیکردنی غەززە لای نووسەرانی ڕۆژئاوا بەردەوامە، تەنانەت هەندێک کەسایەتی لە چەند مانگی ڕابردوودا ڕەخنەیان لە حکومەتەکانی ڕۆژئاوا گرتووە بەهۆی بایکۆتکردن و سانسۆرکردنی چالاکییە کۆمەڵایەتییەکانیان. ئەم نووسەرانە لە چاوپێکەوتنێکدا لەگەڵ ڕۆژنامەی گاردیانی بەریتانی ڕایانگەیاندووە کە، لە چەند مانگی ڕابردوودا، ڕووبەڕووی سنووردارکردنی جددی بوونەتەوە بەهۆی بڵاوکردنەوەی بابەتەکانیان لە سۆشیال میدیا یان نووسینی بەرهەمێک بۆ پشتیوانی لە خەڵکی غەززە و تەنانەت بەرنامە کولتوورییەکانیان بە هۆکاری نالۆژیکی هەڵوەشاوەتەوە.
No Comment! Be the first one.