چاویارنیوز _ ڕەنگە هەڵبژاردەی بەرازیل لە مۆندیالی 2026دا دیاردەیەکی نوێی بە تۆپی پێی جیهانی ناساندبێت؛ یاریزانێک کە زۆر کەس بە نەوەی داهاتووی ئەستێرە گەورەکانی سێلسائۆ دەیزانن.
ڕایان، هێرشبەرە بەڕازیلییە تەمەن 19 ساڵەکە، بۆ یەکەمجار لە مۆندیالدا لە یاریی قۆناغی کۆمەڵەکاندا بەرامبەر سکۆتلەندا لە پێکهاتەی سەرەکی تیپەکەیدا جێگیرکرا و دەستبەجێ کاریگەریی خۆی نیشاندا و ڕۆڵێکی بەرچاوی لە سەرکەوتنی بەرازیلدا بینی و بە پێشکەشکردنی ئەسیستێک شەوی خەونەکانی تەواوکرد.
گرنگی ئەم بۆنەیە بە ئەسیستێک کۆتایی نایەت. ڕایان بە دەرکەوتنی لە پێکهاتەی سەرەکی بەڕازیلدا، بووە یەکەم هەرزەکار کە لە ماوەی 56 ساڵدا لە یارییەکی مۆندیالدا بۆ سێلسائو یاری بکات.
دوایین جار کە بەڕازیل هەرزەکارێکی لە پێکهاتەی سەرەکی خۆیدا جێگیر کرد، لە مۆندیالی 1970 بوو؛ ئامارێک کە دەریدەخات ستافی ڕاهێنەرایەتی چەندە متمانەیان بەم بەهرەمەندە گەنجە هەیە.
ناوبراو بەرهەمی ئەکادیمیای “ڤاسکۆ داگاما”یە و ئێستا لە تۆپی پێی ئەوروپا یاری دەکات، ڕایان پێشتر پێش مۆندیال بە یەکێک لە بەهرەمەندە ئومێدبەخشەکانی تۆپی پێی بەڕازیل دادەنرا.
ناوبراو لە تەمەنی 19 ساڵیدا ناوی لە لیستی کۆتایی کارلۆ ئەنچیلۆتی بۆ مۆندیالدا تۆمارکرا و بووە یەکێک لە گەنجترین یاریزانەکان کە بەشداری پاڵەوانێتییەکە بکات.
هێرشبەرە لاوەکە پێشتر لە ڕیزەکانی لاوانی بەڕازیل ئاستێکی نایابی پێشکەش کردووە و زۆرێک لە شارەزایان پێیان وایە تێکەڵکردنی خێرایی و هێزی جەستەیی و توانای یاریکردنی لە چەند پێگەیەکی هێرشبەریدا دەتوانێت بیکاتە یەکێک لە ئەستێرەکانی داهاتووی تۆپی پێی جیهانی.
لە وڵاتێکدا کە یاریزانانێک وەکوو پێلێ، ڕۆناڵدۆ، ڕۆماریۆ، ڕۆناڵدینیۆ و نەیماری بە تۆپی پێ ناساندووە، هەر بەهرەمەندێکی گەنج لە ژێر چاودێڕی چڕدایە.
No Comment! Be the first one.