چاویارنیوز _ دوای ڕۆیشتنی کریستیانۆ ڕۆناڵدۆ لە هەڵبژاردەی پورتوگال چیتر باسەکە تەنها بابەتی تۆپی پێ نییە و ئێستاش کاردانەوەی ئەندامێکی حکومەتی ئەو وڵاتەی لێکەوتەوە.
ڕۆناڵدۆ لە سەروبەندی یارییەکەی پورتوگال بەرامبەر دانیمارک کەمپی هەڵبژاردەی نیشتمانی بەجێهێشت، دوای ئەوەی ئاگاداری بڕیاری ژێسۆس بوو بۆ ئەوەی گۆنزالۆ ڕامۆسی خستە نێو پێکهاتەی سەرەکی. ئەم بڕیارەی ڕاهێنەرە پورتوگالییەکە کاردانەوەی زۆری لێکەوتەوە، دوای بردنەوەی تیپەکە بە ئەنجامی 4-2 لە دانیمارک، گفتوگۆکان سەبارەت بە داهاتووی ڕۆناڵدۆ لە هەڵبژاردەی نیشتمانیدا چڕتر بووەوە.
لە کاتێکدا ناکۆکی لەسەر بڕیاری تەکنیکی ژێسۆس بەردەوامە، مانوێل کاسترۆ ئەلمێدا، وەزیری ئابووری پورتوگال، باسی لە دەرئەنجامە ئەگەرییەکانی ئەم ڕووداوە کردووە.
ناوبراو لە چاوپێکەوتنێکی تەلەفزیۆنیدا لەگەڵ تۆڕی “ناڤکانال” جەختی لەوە کردەوە کە بەنیازی ئەوە نەبووە لێدوان لەسەر هەڵبژاردنە تەکنیکییەکانی ڕاهێنەری هەڵبژاردەی نیشتمانی بدات، بەڵام پێی وایە بوونی ڕۆناڵدۆ بۆ پورتوگال گرنگە تەنانەت لە دەرەوەی پرسە وەرزشییەکاندا.
وەزیری ئابوری پورتوگال بە ئاماژەدان بە ناوبانگی جیهانی کاپتنی پێشووی تیپەکە، وتی: بەردەوامی هاوکارییەکانی ڕۆناڵدۆ لەگەڵ هەڵبژاردەی نیشتمانی دەتوانێت سوودی بۆ وێنەی نێودەوڵەتی وڵاتەکە هەبێت. بە بۆچوونی ئەو ڕۆناڵدۆ یەکێکە لە کەسایەتییە ناسراوەکانی مێژووی پورتوگال و ناوی ئەو یاریزانە ڕۆڵێکی گرنگی هەبووە لە ناساندنی وڵاتەکەی بە جیهان لەم چەند ساڵەی دواییدا.
بەم شێوەیە پەراوێزخستنی ئەم دواییەی ڕۆناڵدۆ بووەتە پرسێک کە پەیوەندی بە وێنە و براندی نێودەوڵەتی پورتوگالەوە هەیە، جگە لە تۆپی پێ؛ پرسێک کە نیشان دەدات بڕیاری ژێسۆس بۆ دانانی ئەم سوپەرستارە لەسەر کورسی یەدەگ ڕەهەندی زۆر فراوانتری لێ کەوتووتەوە.
No Comment! Be the first one.