“سێرخیۆ ڕامۆس” نزیکە لە گواستنەوەی شۆکهێنەر بۆ یانەی ئەستۆن ڤێلا

چاویارنیوز _ ڕەنگە سێرجیۆ ڕامۆس لە لێواری یەکێک لە گواستنەوە چاوەڕواننەکراوەکانی ژیانی وەرزشیدا بێت.

بەپێی ڕاپۆرتە بڵاوکراوەکان، ئەو بەرگریکارە ئیسپانییە لە گفتوگۆدایە لەگەڵ ئەستۆن ڤێلا و پێدەچێت وەک یاریزانێکی ئازاد ڕوو لە پرێمەرلیگ بکات.

ڕامۆس کە بە یەکێک لە بەرگریکارە سەربەرزەکانی نەوەی خۆی دادەنرێت، لە کۆتایی ساڵی 2025ەوە کە یانەی مۆنتەری جێهێشتووە، بێ یانەیە و تا ئێستاش بەدوای دەرفەتێکدا دەگەڕێت بۆ ئەوەی درێژە بە ژیانی وەرزشی بدات.

ئەو کە ئێستا تەمەنی 40 ساڵە، ئەگەر گواستنەوەی بۆ ئەستۆن ڤێلا کۆتایی پێبێت، بۆ یەکەمجار لە ژیانی پڕۆفشناڵدا یاری تۆپی پێی ئینگلتەرا دەکات.

ڕاپۆرتەکان ئاماژە بەوە دەکەن کە ئەستۆن ڤێلا بەهۆی بارودۆخی هێڵی بەرگری و هەروەها بە هۆی دەستپێکردنی لاوازی بۆ وەرزی نوێ، بارودۆخی بەرگریکارە بەئەزموونەکەی پشکنیوە. تیپەکەی ئونای ئیمری لە چوار یاری سەرەتایی خولی نایابی ئینگلیزی تەنها یەک خاڵی بەدەستهێناوە و دوای دۆڕانەکەی لە یانەی نۆتینگام فۆڕێست بە دوو گۆڵ بەرامبەر بە گۆڵێک لە پلەی 19ی ڕیزبەندی خولەکەدایە.

ڕامۆس دەتوانێت ببێتە بژاردەیەکی جیاواز بۆ ڤیلا لەڕووی ئەزموون و سەرکردایەتییەوە. ساڵانێکی زۆر کاپتنی ڕیال مەدرید و هەڵبژاردەی ئیسپانیا بووە و چوار جار نازناوی چامپیۆنزلیگی بەدەستهێناوە. بوونی یاریزانێکی لەو جۆرە لە ژووری جلگۆڕین لەگەڵ تیپێک کە کێشەی بەرگری و ئەنجامە خراپەکانی هەیە، دەتوانێت بۆ ئیمری سەرنجڕاکێش بێت.

بەڵام گواستنەوەی ڕامۆس بۆ ئەستۆن ڤێلا هێشتا دوورە لە دڵنیابوون و هەواڵەکانی ئێستا زیاتر باس لە دانوستان و نزیکبوونەوەی هەردوولا لە ڕێککەوتن دەکەن. هەندێک سەرچاوە ئیدیعایان کردووە کە ئەگەر گرێبەستەکە بەڕێوە بچێت، دەکرێت هەفتەی داهاتوو پزیشکییەکەی ئەنجام بدرێت.

ئەگەر ئەم گواستنەوەیە کۆتایی پێبێت، دەرکەوتنی ڕامۆس لە تەمەنی 40 ساڵیدا لە خولی نایابی ئینگلیزی یەکێک دەبێت لە چیرۆکە سەرنجڕاکێشەکانی ئەم وەرزە؛ گەڕانەوەی پاڵەوانێکی گەورەی تۆپی پێی ئەوروپی بۆ ئەزموونکردن لە یەکێک لە خولە نایابەکانی جیهاندا.