فلیک: چێڵسی زۆر نایابە، ئێمە ئامادەین

چاویارنیوز _ هانسی فلیک ڕاهێنەری بەرشەلۆنە، پێش یارییە چارەنووسسازەکەی تیپەکەی بەرامبەر چێڵسی لە چامپیۆنزلیگدا، ستایشی ئاست و فەلسەفەی تیپی ئینگلتەرای کرد، هەروەها پشکنینی کرد بۆ تایبەتمەندییەکانی یاریزانی بەرامبەر و ئەو تەحەددایانەی کە لە پێشدایە.

فلیک سەرەتا ئاماژەی بە هێز و پێکهاتەی تیپی چێڵسی کرد و ڕایگەیاند: چێڵسی یەکێکە لە باشترین تیپەکانی جیهان، ئەو پێشکەوتن و گۆڕانکاریانەی لەم یانەیەدا ڕوویانداوە نایاب و ناوازەن، یاریزانی لاوی زۆر باشیان هەیە و ڕاهێنەرێکی نایابیان هەیە، بەڕاستی سەرسامم بەوەی کە دەیکەن. تیپێکی گەنجە و یاریزانی ناوازەی هەیە.

ڕاهێنەرە ئەڵمانییەکە لە درێژەی قسەکانیدا وتی: بۆ ئێمە یارییەکی نایاب دەبێت بۆ ڕکابەریکردن، ئەوە چامپیۆنزلیگە و ئاسان نییە، بەڵام ئێمە متمانەمان بەخۆمان هەیە و وەک هەمیشە شەڕ دەکەین، چێڵسی تیپێکی پێشڕەوانەیە لەگەڵ تۆپ، ئێمەش هەروا، ئەوان دەیانەوێت فشار بخەنە سەر ئێمە و،ئێمەش هەمان شتمان دەوێت، هەردوو یانەکە تۆپیان دەوێت و ئێمە هەمیشە لەگەڵ یاریزانی بەرامبەردا خۆمان دەگونجێنین.

فلیک هەروەها باسی لە گرنگی گونجانی تاکتیکی و نەرمی تیپەکەی کرد و وتی: ئێمە دەزانین چۆن دەمانەوێت یاری بکەین، بەڵام بەپێی یاریزانی بەرامبەر، هەموو یارییەک جیاوازە، هەمیشە باشترینمان دەدەین و لە بەرزترین ئاستدا یاری دەکەین، چونکە ئەمە چامپیۆنزلیگە.

ڕاهێنەری بەرشەلۆنە لە درێژەی قسەکانیدا ستایشی شێوازی یاریکردن و شێوازی ڕاهێنانەکانی تیپەکەی لە سەردەمی پیپ گواردیۆلا کرد و وتی: هەمووان شێوازی یاریکردن و شێوازی ڕاهێنانەکانی تیپەکەیان خۆشدەویست، کاتێک گواردیۆلا هاتە ئەڵمانیا، من ناڵێم ئێمە کۆپیمان کرد، بەڵام بە دڵنیاییەوە سەیری چۆنیەتی کارکردنیمان کرد، ئەو ڕێگای ڕاستی بۆ زۆرێک لە ڕاهێنەرەکان نیشان دا، بەڵام هەمیشە جیاوازی بوونی هەیە.

هانسی فلیک لە کۆتاییدا ئاماژەی بە یارییەکەی داهاتوو کرد و وتی: یارییەکەی بەرامبەر چێڵسی خەیاڵییە، من لێرە بیرەوەری زۆر باشم هەیە و هیوادارم سبەی بیرەوەرییەکی باشی دیکەشی پێ زیاد بکەم.