ستیڤن جیرارد لە قەیرانی لیڤەرپوول ڕەخنەی توندی گرتووە

چاویارنیوز ـــ ستیڤن جیرارد، ئەفسانەی لەبیرنەکراوەکەی لیڤەرپوول، دوای ئەنجامە نائومێدکەرەکانی ئەم دواییەی تیپەکە، شیکارییەکی ڕاشکاوانەی پێشکەش کرد؛ شیکارییەک کە ڕەنگدانەوەی بەرفراوانی لە میدیاکاندا هەبوو.

جیرارد کە هەمیشە بە یەکێک لە دەنگە ڕاستگۆکانی تۆپی پێی ئینگلتەرا ناسراوە، ئەمجارە دیسانەوە بەبێ هیچ خۆنمایشکردنێک، کێشەکانی لیڤەرپوڵی بە شێوەیەکی ورد و قووڵ وەسف کردووە.

سەرەتا دۆخی ئێستای تیپەکەی بە قبوڵنەکراو زانی و ڕایگەیاند کە لیڤەرپوول لە چەند هەفتەی ڕابردوودا بە شێوەیەکی سەیر و سادە گۆڵەکانی لێدەدا؛ بە تایبەتی لەسەر هێرشی دژە هێرش و گواستنەوە. جیرارد پێی وایە تیپەکە لە ڕووی پێکهاتەوە لاواز و ناسک بووە و ئەم لاوازییەش لە یارییە گەورەکاندا بە ڕوونی دیارە. یەکێک لە خاڵە دیارەکانی وتارەکەی ئاماژە بە کاردانەوەی هاندەران بوو: “کاتێک گۆڵی سێیەمیان لێدا، ستاندەکان دەستیان بە بەتاڵبوونەوە کرد. تەنانەت لە ئەنفیڵدیشەوە دەکرا بزانیت دۆخەکە باش نییە.”

ناوبراو جەختیشی لەوە کردەوە کە کێشەکانی لیڤەرپوول ڕووکەش نین، بەڵکو ڕیشەیەکی قووڵیان هەیە، شتێک کە بە بڕیارێکی سادە چارەسەر ناکرێت و پێویستی بە چاکسازییەکی جددی و ڕیشەیی هەیە. بەڵام جیرارد ڕەتیکردەوە وشەی قەیران بەکاربهێنێت. ئاماژەی بەوەشکرد، بەکارهێنانی وشەی “قەیران” “بێڕێزیکردنە بەرامبەر بەو یاریزانانە و ئەو بەڕێوەبەرەی کە جامەکانی یانەکەیانی بەدەستهێناوە”، بەڵام دانی بەوەدانا کە تیپی ئێستا لەسەر ڕێگایەکی کارەساتبار وەستاوە، لە هەر یارییەکدا زەربەیەکی نوێی لێدەکەوێت، دۆخێک کە بە خوێنبەربوونی بەردەوامی دەیشوبهێنێت

جیرارد هۆشداریدا لەوەی ئەگەر ستافی ڕاهێنەرایەتی نەتوانن بە خێرایی چارەسەر بۆ کێشەی پێکهاتەکە بدۆزنەوە، بەتایبەتی لە هێڵی هێرشبردندا، دۆخەکە نەک هەر بەردەوام دەبێت بەڵکو ئەگەری هەیە خراپتر بێت. قسەکانی جیرارد دەنگدانەوەی نیگەرانییە قووڵەکانی هاندەرانی لیڤەرپوول بوو، نیگەرانییەکە کە هەر ڕۆژ بەهێزتر دەبێت.