چاویارنیوز ـ بڵاوکردنەوەی فایلێکی ٢٣٠ لاپەڕەیی لە دادگاکانی ئەمریکا، جارێکی دیکە بنەماڵەی بارزانی و بەشێک لە کەسایەتییە باڵاکانی پارتی دیموکراتی کوردستانی عێراقی خستە لوتکەی هەواڵی میدیاکانی ناوچەکە. ئەو بەڵگەنامانە کە لە دۆسیەیەکی یاسایی لە ئەمەریکا سەریهەڵداوە، تۆمەتی گواستنەوەی سەرمایە و کڕینی موڵک و ماڵی بەرفراوان و چالاکی کۆمپانیا بیانییەکان و تۆڕێکی پەیوەندی دارایی پەیوەست بە ئەندامانی بنەماڵەی بارزانی لەخۆدەگرێت.
بەپێی ئەو بەڵگەنامانەی کە ئاراستەی دادگای ناوچەی ئەمریکا لە ویلایەتی دێلاوێر کراوە، ناوی مەسرور بارزانی، سەرۆکی حکومەتی هەرێمی کوردستانی عێراق لەگەڵ ژمارەیەک لە برا و کەسوکاری، لە دۆسیەیەکدا وروژێنراوە کە تیایدا داواکاران ئیدیعای چالاکیی دارایی بەرفراوان دەکەن لە ئەمریکا و هەندێک وڵاتی دیکە.
ئەوەی ئەم کەیسە لە کەیسەکانی دیکەی هاوشێوە جیادەکاتەوە، قەبارەی زۆری بەڵگەنامە و وردەکارییەکانی وروژێنراون سەبارەت بەو سەروەت و سامان و موڵکانەی کە دەگەڕێندرێنەوە بۆ ئەندامانی بنەماڵەی بارزانی لە ئەمریکا. لەم بەڵگەنامانەدا باس لە دەیان موڵک و کۆمپانیا و وەبەرهێنان لە ویلایەتە جیاجیاکانی ئەمریکا بە تایبەت ڤێرجینیا و کالیفۆرنیا و واشنتۆن کراوە.
سەرچاوەی سەرەکی ئەم ئاشکراکردنی زانیاریانە دەگەڕێتەوە بۆ داوای یاسایی مەهتاب مۆر دژی جۆناسان مۆر هاوسەری پێشووی. لە کاتی دۆسیەی جیابوونەوەکەدا، مێهتاب مۆر کۆمەڵێک بەڵگەنامەی دارایی و بانکی و کۆمپانیاکانی خستە بەردەم دادگا و بانگەشەی ئەوەی کرد کە هاوسەرەکەی لە ماوەی ساڵانی ڕابردوودا ڕۆڵی هەبووە لە دروستکردنی پێکهاتەی دارایی پەیوەست بە بەشێک لە ئەندامانی بنەماڵەی بارزانی.
لە بەشێک لەو بەڵگەنامانەدا ناوی مەنسور بارزانیش هاتووە، ئیدیعاکانیش سەبارەت بە چالاکییە داراییەکانی و وەبەرهێنانە گەورەکانی لە ئەمریکا ئاماژەی پێکراوە. هەروەها هەندێک بەڵگەنامە ئاماژە بە کڕینی کۆشکێکی لوکس لە شاری بێڤەرلی هیڵز و تێچووی چەند دەیان ملیۆن دۆلار دەکەن بۆ کڕین و نۆژەنکردنەوەی.
هەروەها لە بەشێکی ئەم دۆسیەیەدا ناوی وەیسی بارزانی سەرۆکی ئەنجومەنی ئاسایشی هەرێمی کوردستان هاتووە. بەشێک لە داوا یاساییەکان باس لەوە دەکەن کە ناوبراو لە کەیسەکانی پەیوەست بە کڕینی ئامێری چاودێری پێشکەوتوو و هاوکاری لەگەڵ کۆمپانیاکانی تەکنەلۆجیا دەستی هەبووە؛ بابەتێک کە هێشتا لە ژێر پێداچوونەوەی دادوەریدادایە.
هەروەها لە دۆسیە یاسایی و ئابوورییەکانی دیکەدا کە لە دادگاکانی ئەمریکا تۆمار دەکرێن، ناوی سیروان بارزانی و بەشێک لە کۆمپانیاکانی سەر بە خۆی هاتووە. بەشێک لەو حاڵەتانە پەیوەندییان بە ناکۆکی بازرگانی و وەبەرهێنان و داواکاری داراییەوە هەیە کە پەیوەندییان بە چالاکییە ئابوورییەکانی ناوخۆ و دەرەوەی هەرێمی کوردستانەوە هەیە.
بەپێی بەڵگەنامە بڵاوکراوەکان، داواکاران بانگەشەی ئەوە دەکەن کە لە ماوەی ساڵانی ڕابردوودا تۆڕێک لە کۆمپانیاکانی تۆمارکراو لە ئەمریکا و هەندێک ناوچەی دەریایی بۆ کڕینی خانووبەرە و بەڕێوەبردنی سەروەت و سامان بەکارهێنراون. لەم نێوەندەدا ناوی چەند کۆمپانیا و سندوقە داراییەکانیش لە بەڵگەنامەکانی دادگادا هاتووە.
بڵاوکردنەوەی ئەم دۆسیەیە لە میدیاکانی ئەمریکا و عێراقی و هەرێمی کوردستاندا ڕووماڵێکی بەرفراوانی لێکەوتەوە و زۆرێک لە چاودێرانی سیاسی پێیان وایە ئەگەر پرۆسەی دادوەری بەردەوام بێت لە چەند مانگی داهاتوودا لایەنی زیاتری ئەم دۆسیەیە ئاشکرا دەبێت.
بەڵام پێویستە ئاماژە بەوە بکرێت کە بەشێکی بەرچاو لەو تۆمەتانەی لەم بەڵگەنامانەدا خراونەتەڕوو، هێشتا لەژێر پێداچوونەوەی دادوەریدان و تا ئێستا هیچ بڕیارێکی یەکلاکەرەوە لەلایەن دادگاکانی ئەمریکاوە لەسەر زۆرێک لەو تۆمەتانەی کە خراونەتەڕوو دەرنەچووە.
ئەو دۆسیەیە کە وەک ناکۆکی خێزانی و داواکاریی تەڵاق دەستی پێکرد، ئێستا بووەتە یەکێک لە دۆسیە هەرە مشتومڕاوییەکانی پەیوەست بە بنەماڵەی بارزانی لەم چەند ساڵەی دواییدا و سەرنجی میدیای بەرفراوان و جەماوەری بۆ لای خۆی ڕاکێشاوە.
No Comment! Be the first one.