چەکی دزراو و میدیای چەواشەکار ، کێ بەرپرسیارە ؟

ئەگەر چەکێک ون ببێت، یەکەم پرسیار دەبێت ئاراستەی هەولێر و حکومەت بکرێت، نەک سلێمانی، چونکە بنکەکانی ئەمریکا لە هەولێرن، سەرۆکی حکومەت پارتییە و هەموو سیستەمی ئەمنی و سەربازی لە ژێر دەستی هەولێردایە، بۆیە هەوڵدانی پارتی بۆ گواستنەوەی تاوان بۆ لایەنێکی تر، زیاتر لەوەی وەڵام بێت و هەوڵێکە بۆ شاردنەوەی شکستی خۆی.

حکومەتی مسرور بارزانی لە ماوەی چەند ساڵی رابردوو دا لە زۆر بواردا شکستی هێناوە بۆ نموونە؛- لە مووچە، لە خزمەتگوزاری، لە ئازادی میدیا و ئێستاش لە بابەتی ئاسایش و متمانەی نێودەوڵەتی، کاتێک حکومەت ناتوانێت وەڵامی ڕوون بداتەوە، ناچار دەبێت پەنا بۆ تۆمەت و هەڵمەتی میدیایی ببات.

ئەوەی زیاتر جێی مەترسییە، ئەوەیە کە هەندێک لە پەیامنێر و کەناڵە نزیکەکانی پارتی لە دەرەوەی وڵات، بە تایبەت لە ئەمریکا، بەبێ هیچ بەڵگە و لێکۆڵینەوەیەکی فەرمی، دەستیان کردووە بە بڵاوکردنەوەی ئەو تۆمەتانە، ئەمە تەنها شەڕێکی میدیایی نییە، بەڵکو هەوڵێکە بۆ چەواشەکردنی ڕای گشتی و بەلاڕێدابردنی پرسیارە سەرەکییەکان، چونکە ئەگەر ئەمریکا بڵێت چەک ون بووە، بە دڵنیاییەوە زانیاریی وردی لەسەر شوێن و ئاراستەی چەکەکان هەیە. وڵاتێکی وەک ئەمریکا، بەو هەموو سیستەمە ئەمنی و هەواڵگرییە گەورەیەوە، ناکرێت نەزانێت چەکەکانی لە کوێ ون بوون.

پرسیارە سەرەکییەکە ئەوەیە:- بۆچی پارتی پەلەی کرد بۆ تۆمەتبارکردنی یەکێتی؟ ئایا مەبەست لێی شاردنەوەی لاوازییەکانی خۆیەتی؟ یان هەوڵدانە بۆ دروستکردنی دوژمنێکی ناوخۆیی بۆ هەڵخەڵەتاندنی ڕای گشتی؟ لە کاتێکدا هاووڵاتیی کورد چاوەڕێی وەڵامی ڕوون و بەرپرسانەن، کەچی هێشتا میدیای دەسەڵات بە زمانی تۆمەت و دابەشکاری قسە دەکات، ئەوەش ڕاستییەکی تاڵ دەردەخات، کێشەکە تەنها ونبوونی چەک نییە، بەڵکو قەیرانی متمانە و حکومڕانییە.

کێشەکە ئەوە نییە چەکەکان لە کوێن؛ کێشەکە ئەوەیە حکومەتێک هەیە کە لەبەرامبەر هەر قەیرانێک، لە جێگای وڵامێکی روو و هەستکردن بە بەرپرسیاری دێت و تۆمەت هەڵدەبژێرێت.

بەدران محێدین