هەولێر مافی ئەوەی نییە سەربەخۆ گرێبەستی نەوتی ئەنجام بدات
چاویار – ئەندامێكی لیژنەی نەوت و غازی پەرلەمانی عێراق ڕایگەیاند، حكوومەتی عێراق سكاڵای یاسایی لە دژی حكومەتی هەرێمی كوردستان تۆمار كردووە، بەهۆی ئەو گرێبەستەی لەگەڵ كۆمپانیا ئەمریكییەكان كردوویەتی بەبێ ڕەزامەندی حكومەتی فیدراڵ، كە ئەمەش پێشێلكردنی بڕیارەكەی دادگای فیدراڵیە.
عەلا حەیدەری ئەندامی لیژنەی نەوت و غازی پەرلەمانی عێراق سەبارەت بە تۆماركردنی سكاڵا لەلایەن بەغداوە دژی حكومەتی كاربەڕێكەری هەرێمی كوردستان لێدوانی دا.
عەلا حەیدەری ڕایگەیاند، حكومەتی عێراق سكاڵای یاسایی لەسەر هەرێمی كوردستان تۆمار كردووە بەهۆی گرێبەستكردن لەگەڵ كۆمپانیا نەوتییە ئەمریكییەكان بەبێ ئەوەی ڕاوێژ بە حكومەتی عێراق بكەن.
ئاماژەی بەوەشكرد، بڕیارەكەی دادگای فیدراڵی هەولێری پابەندكردووە بە گەڕانەوە بۆ بەغدا سەبارەت بە گرێبەستە نەوتییەكان، دەبێت نەوت و غازی هەرێم لە دەستی كۆمپانیای سۆمۆدا بێت، هەولێریش مافی ئەوەی نییە سەربەخۆ گرێبەست ئەنجام بدات.
جێگای ئاماژەیە، ٢٠ـی ئەم مانگە مەسرور بارزانی سەرۆكی حكومەتی كاربەڕێكەری هەرێمی كوردستان لە واشنتۆن گرێبەستێكی بۆ بەرهەمهێنانی نەوت و غازی سنووری سلێمانی لەگەڵ دوو كۆمپانیایی ئەمریكی و كەنەدی بە بەهای ١١٠ ملیاری دۆلار واژۆكرد، لە بەرامبەردا وەزارەتی نەوتی عێراق لە ڕاگەیاندراوێكدا داوای یاسایی لەسەر ئەو هەنگاوە تۆماركرد.
No Comment! Be the first one.