لەپێناو رێوڕەسمی ماڵئاوایی لە تەرمی ئایەتوڵڵا خامنەیی، عێراق لەهەشت پارێزگا پشووی راگەیاند

چاویارنیوز _ حکومەتی عێراق، رۆژی چوارشەممەی داهاتووی بەبۆنەی رێوڕەسمی پێشوازیكردن لە تەرمی عەلی خامنەیی رابەری پێشووی ئێران کرد بە پشوو، رێوڕەسمەکە لە هەردوو پارێزگای نەجەف و كەربەلا بەڕێوەبچێت، بەو بۆنەیەوە لە پارێزگاکانی بەغدا و نەجەف و كەربەلا و بابل و زیقار و بەسرە و میسان و واست، پشووی رەسمییە.
حەیدەر كبوون لێپرسراوی بەشی رێوڕەسم و سەردانییە ملیۆنییەکان لە دیوانی پارێزگای نەجەف دەڵێت: رێوڕەسمەکە، لە سەعات 6ی بەیانی رۆژی چوارشەممەوە، لە پردی نەخۆشخانەی سەدرەوە بەرەو مەزاری ئیمام عەلی دەست پێ دەكات، بۆ ئەو مەبەستەش لیژنەی پێشوازیكردن ئامادەکاری تەواوی کردووە و تا ئێستا زیاتر لە 60 كەژاوەی حوسێنی بۆ خزمەتکردنی بەشداران ناویان تۆمارکردووە و پێشبینی دەكرێت ژمارەكە بۆ زیاتر لە 100 كەژاوە بەرز ببێتەوە.
تایبەت بە رێوڕەسمەکەش، یووسف كناوی پارێزگاری نەجەف وتوویەتی: دوو بەرنامەیان بۆ رێوڕسمەكە هەیە، یەكەمیان بریتییە لە بەشی رەسمی بە بەشداریی سەرۆكایەتییەكان و سەركردەی هێزە سیاسییەكان و وەزیر و پەرلەمانتاران، دووەمیشیان بریتییە لە بەشی جەماوەری بە بەشداریی توێژە جیاوازەکانی كۆمەڵگە.