یەکێک لە گرنگترین شتەکان کە دەبێت لەبەرچاو بگیرێت لە کاتی دووگیانبووندا، بابەتی هێلکەدانانە. ئەمەش پێویستە لە کاتی گونجاودا ئەنجام بدرێت بۆ ئەوەی ئەگەری دووگیانبوونت زیاتر بێت. بەزۆری هێلکەدانان نزیکەی 14 ڕۆژ پێش سوڕی مانگانەی داهاتووە.
بێگومان ئەم ژمارەیە بۆ هەموو کەسێک وەک یەک نییە و بەپێی درێژیی سوڕی مانگانەت دەتوانێت جیاواز بێت. زانینی باشترین کات بۆ ئەنجامدانی ئەم کارە دەتوانێت یارمەتییەکی زۆرت بداتێ بۆ دووگیانبوون.
هێلکەدانان واتای چییە؟
هێلکەدانان بریتییە لەو کاتەی کە هێلکەیەک لە هێلکەدانەوە دەردەچێت، پاشان بە بۆریی فالۆپدا دەڕواتە خوارەوە، پاشان لەگەڵ سپێرم جووت دەبێ. هێلکە دوای دەرچوونی لە هێلکەدا کاتێکی زۆری نییە بۆ ئەوەی پیتێنرێت، بەڵام سپێرم دەتوانێت بۆ چەند ڕۆژێک لە جەستەی ئافرەتدا بژی.
بۆیە ئەگەر لە ڕۆژانی پێش هێلکەداناندا سێکس ئەنجام بدرێت، ئەوا سپێرم دەتوانێت لە جەستەدا بمێنێتەوە و کاتێک هێلکەکە دەرەچیت لەگەڵی جووت بێت.
دیاریکردنی کاتی هێلکەدانان
کاتی وردی هێلکەدانان بۆ هەموو کەسێک وەک یەک نییە و تەنانەت ڕەنگە بۆ هەمان کەس لە مانگێکەوە بۆ مانگی دیکە کەمێک بگۆڕێت.
چەند ڕێگایەک هەیە کە دەتوانرێت بەکاربهێنرێت بۆ دۆزینەوەی کاتی هێلکەدانان. هەندێک لەو ڕێگایانە سادەن و دەتوانرێت لە ماڵەوە ئەنجام بدرێت، هەندێک ڕێگاش وردترن. ڕێگا باوەکان بۆ دیاریکردنی کاتی هێلکەدانان بریتین لە:
- حیسابکردنی کاتی هێلکەدانان بەپێی سوڕی مانگانە
- پێوانی پلەی گەرمی بنەڕەتی جەستە
- بەکارهێنانی کیتی هێلکەدانان
- سۆنەر بۆ پشکنینی گەشەی فۆلیکۆلەکان
لەم بەشەی خوارەوەدا هەریەکێک لەم ڕێگایانە بەجیا دەناسێنین و پێتان دەڵێین کە چۆن دەکرێ بەکاریان بهێنی بۆ دۆزینەوەی کاتی هێلکەدانان.
حیسابکردنی کاتی هێلکەدانان بەپێی سوڕی مانگانە
ئەگەر سوڕی مانگانە ڕێکوپێک بوو، دەتوانرێت کاتی نزیکەی هێلکەدانان حیسابی بۆ بکرێت. بەزۆری هێلکەدانان نزیکەی 14 ڕۆژ پێش سوڕی مانگانەی داهاتوو ڕوودەدات.
بۆ نموونە ئەگەر سووڕەکەت 28 ڕۆژ بێت، بەزۆری هێلکەدانان لە دەوروبەری ڕۆژی 14دا دەبێت، ئەگەر سوڕەکە 30 ڕۆژ بێت، ئەمجارە لە دەوروبەری ڕۆژی 16دایە.
بۆ حیسابێکی وردتر، بەرواری دەستپێکردنی سوڕی مانگانەت بۆ چەند مانگێک بنووسە و دواتر درێژی خولەکان بەراورد بکە. ئەم شێوازە بۆ ئەو کەسانە بەسوودترە کە سوڕی مانگانەیان ڕێک و پێکە.
بەکارهێنانی کیتی هێلکەدانان
کیتی هێلکەدانان بە پشکنینی میز زیادبوونی هۆرمۆنی LH نیشان دەدات. ئەم هۆرمۆنە ماوەیەکی کەم پێش هێلکەدانان زیاد دەکات. کەواتە کاتێک ئەنجامی کیتەکە پۆزەتیڤ بوو، ئەوە مانای وایە کە هێلکەدانانیش نزیکە.
هەر لەبەر ئەم هۆکارە ئەم کیتە یارمەتیدەرە لە دۆزینەوەی ڕۆژە گونجاوەکان بۆ دووگیانبوون بە ڕێژەیەکی کەمی هەڵە.
سۆنەر بۆ پشکنینی گەشەی فۆلیکۆلەکان
یەکێک لە وردترین ڕێگاکان بۆ پشکنینی هێلکەدانان بریتییە لە سۆنەر. لەم ڕێگایەدا پزیشک پشکنینی گەشەی فۆلیکۆلی ناو هێلکەدان دەکات. فۆلیکۆل بریتییە لە کیسەیەکی بچووک کە هێلکەکە تێیدا گەشە دەکات و لەگەڵ گەشەکردنیدا پزیشک دەتوانێت ئامادەیی هێلکەکە دیاری بکات بۆ ئەوەی دەربچێت.
هەندێک جار، یەک سۆنەر بەس نییە و پزیشک لە ڕۆژانی جیاوازدا چەند سۆنەرێک ئەنجام دەدات. پاشان بە بەراوردکردنی ئەنجامی ئەم سۆنەرانە، کاتی نزیکبوونەوەی هێلکەدانان، باشتر دیاری دەکرێت.
ئەگەر مەبەستت دووگیانی بە شێوازی IVF، ئەوا پرۆسەی گەشەی فۆلیکۆل و کاتی هێلکەدانان بە یەکێک لە قۆناغە سەرەکییەکان دادەنرێت.
پێوانی پلەی گەرمی بنەڕەتی جەستە
پلەی بنەڕەتی گەرمی جەستە لە ڕاستیدا هەمان پلەی گەرمی جەستەیە لە کاتی پشووداندا. بۆ پێوانەکردنی، پێویستە هەموو بەیانیەک پلەی گەرمی جەستەت بپێویت، پێش ئەوەی لە جێگاکەت هەڵبستیت.
دوای هێلکەدانان، پلەی گەرمی جەستەت کەمێک بەرز دەبێتەوە. ئەم گۆڕانکارییە بەزۆری بچووکە و لەوانەیە بە ئاسانی هەستی پێ نەکەیت.
بۆ بەکارهێنانی ئەم شێوازە پێویستە هەموو ڕۆژێک پلەی گەرمی جەستەت تۆمار بکرێت بۆ ئەوەی دوای چەند خولێک، شێوازی گۆڕانی پلەی گەرمی باشتر دیاری بکرێت.
ئەمەش یارمەتیت دەدات باشتر لە شێوازی هێلکەدانان لە خولەکانی دواتردا تێبگەیت. چونکە بەرزبوونەوەی پلەی گەرمی بەزۆری دوای هێلکەدانان، ڕوودەدات و ناتوانێت پێشوەختە کاتی وردی دیاری بکات.
نیشانەکانی هێلکەدانان چین؟
هەندێک کەس نزیک بە کاتی هێلکەدانان تووشی گۆڕانکاری دەبن لە جەستەیاندا کە هەستی پێدەکەن. هەرچەندە هەموو کەسێک هەست بەم نیشانانە ناکات، بەڵام دەتوانن یارمەتیدەر بن بۆ دیاریکردنی ڕۆژەکانی نزیک لە هێلکەدانان. لەم دۆخەدا لەوانەیە یەکێک یان زیاتر لەم نیشانانەی خوارەوەت هەبێت.
- گۆڕانکاری لە دەردانی زێ
- ئازار یان ناڕەحەتی سووک لە بەشی خوارەوەی سکدا
- زیادبوونی ئارەزووی سێکسی
- کەمێک بەرزبوونەوەی پلەی گەرمی لەش
- هەستیاربوون یان ئازاری مەمک
بێگومان هەبوونی ئەم نیشانانە هەمیشە بە مانای هێلکەدانان نییە. بەڵام بوونی ئەوان لەگەڵ ڕێگاکانی وەک حیسابکردنی سوڕی مانگانەت یان بەکارهێنانی کیتی هێلکەدانان، دەتوانێت یارمەتیدەرێکی زۆر بێت لە دۆزینەوەی کاتی هێلکەداندا.
هێلکەدانان لە کاتی ورددا تا چەندە ئەگەری دووگیانی زیاد دەکات؟
زانینی کاتی وردی هێلکەدانان ئەگەری دووگیانی زۆر زیاد دەکات. هۆکارەکەی سادەیە، هێلکە دوای دەرچوون لە هێلکەدان زۆر لە ژیاندا نامێنێت و کاتێکی سنوورداری هەیە بۆ پیتاندنی. ئەگەر کاتی هێلکەدانان بزانرێت، دەکرێت ڕۆژانی گونجاوتر بۆ سێکس بدۆزرێتەوە. لەم ڕۆژانەدا ئەگەری گەیشتنی سپێرم زیاترە بۆ هێلکە.
بێگومان سێکس پێویست ناکات بە وردی لە ساتەوەختی هێلکەداناندا ئەنجام بدرێت، تەنانەت چەند ڕۆژێک پێش هێلکەدانان کاتێکی باشە بۆ دووگیانبوون.
No Comment! Be the first one.