چاویارنیوز – لەم گرژیی و قەیرانە نوێیە جارێكی دیكە دووپاتبوویەوە كە بڕیاربەدەست و حوكمڕانانی كورد نەك سودیان لەشكست وەرنەگرتووە، بگرە شكست بەشكستی دیكە دەسپێرن.
پەندێكی كۆنی تورك هەیە دەڵێت “خۆزگە بەعەقڵی كورد دوای شكست” مەبەست لێی كورد دوای شكست ئینجا پەنجەی خۆی دەگەزێت و بەخۆیدا دەچێتەوە، بەڵام پێدەچێت ئەم پەندەش دەرەقەت بڕیارو هەڵە یەك لەدوای یەكەكانی بڕیاربەدەستانی كورد نەیەت. بەداخەوە نەك دەرس لەشكست وەرناگرن بگرە شكست بەشكست دەسپێرن. دوای هەر شكستێكیش، كوردایەتی و قەومەچێتی دەكەنە چادرێكی گەورە بۆ داپۆشینی شكستەكەیان.
مخابن بڕیاربەدەستانی كوردستان لەڕوانگەی بەرژەوەندی تەسكی حزبی و شەخسی و بنەماڵەییەوە دەڕواننە ئایندەی كوردستان، لەكوێ مەترسی لەسەر بەرژەوەندیان هەبوو، لەوێ مەترسی لەسەر كوردستان هەیە! لەهەمووی خراپتر هەركات مەترسی لەسەر بەرژەوەندییەكانیان دروستبوو، كۆمەڵگا دەكەنە دووبەش، ئەوانەی لەگەڵیانن بەرگی نیشتیمانپەروەریان لەبەردەكەن و ئەوانە پێشمەرگەن، ئەوانەیشی لەگەڵیان نین، ئیدی ئەوانە خائین و خۆفرۆشەكانن! لەم بەم پێودانگە كۆمەڵگا پۆلین دەكەن.
لای ئەوان بەقاچاخفرۆشتنی سامانی سروشتیی و دیارنەمانی داهات و بێئەرزشكردنی پەرلەمان و دامەزراوەكانی حوكمڕانیی و ژەهراویكردنی ژینگەو یەكنەخستنەوەی هێزی پێشمەرگە و بوونی هێزی چەكداری حزب و تێكدانی دادگاو بازدان بەسەر دەستورو یاسا لەپێناو بەرژەوەندی حزب و …تد عەیبەو خیانەت نییە! بەڵكو عەیبە و خیانەت ئەوەیە كە تۆ باسی بەقاچاخبردنی نەوت و دیارنەمانی داهات و سامانی گشتیی و لەدەستدانی شەرعیەتی حوكمڕانیی و خراپەكارییەكانیان بكەیت! یاخود ئامادەنەبیت بچیتە دیوەخانی حزبییان و لەدەرەوەی پەرلەمان بڕیار بدرێت!
لەكوێی دوونیابووە میللەتێك سەدان ساڵ بەدەست داگیركەریی و ستەمكاریی بێگانەوە بناڵێنێت كەچی ئەمڕۆ بەدەست حوكمڕأنانییەوە دادو بێدادی بێت؟! لەمێژووی كام میللەت بووە 34 ساڵ بەسەر حوكمڕانیەكەی خۆی تێپەڕێت كەچی تائێستا هێزێكی یەكگرتووی پێشمەرگەو نوێنەرایەتیەكی پەرلەمانیی شەرعیی و حكومەتێكی نیشتیمانیی یەكگرتووی نەبێت؟
لەمێژوودا دەوڵەت بۆ خزمەتی خەڵك و لەپێناوی دادپەروەریی و دابینكردنی نان و ئاسایش دروستبووە، بەڵام لێرە بەپێچەوانەوەیە! هەموو دامەزراوەكانی دەوڵەتداریی لەخزمەت حزبی سەردەست و كەمینەیەكی بڕیاربەدەست و خۆشگوزەرانە! خەڵكەكەش بێدەرەتان و داماو و هەشبەسەر، لەچاوەڕانیی مەرحەمەت و كەرەمی ئەم كەمینەیەن.
حوكمڕانانی هەرێم.. سپاردنی شكست بەشكست / سەرتیپ جەوهەر
بڕیاربەدەستانی كوردستان لەڕوانگەی بەرژەوەندی تەسكی حزبی و شەخسی و بنەماڵەییەوە دەڕواننە ئایندەی كوردستان.
No Comment! Be the first one.