چاویارنیوز ـ د.عه‌داله‌ت عه‌بدوڵڵا نووسەر و ڕۆژنامەنووس و مامۆستای زانکۆ لە وتارێکدا کە ئەمەی خوارەوە دەقەکەیەتی ، دەنووسێت::
بەو كەمپینە میدیاییانە‌شەوە، كە بەداخەوە، لەجیاتی رووماڵی پیشەیی، بە زمانی پڕوپاگەندە بەڕێوەدەچن، بەتایبەتی لەئاست هەلومەرجی پارێزگای سلێمانی، هێشتا چەقی كاری هێزە ئۆپۆزسیۆنەكان، دەزگا میدیاییەكانیان، راگەیاندنی ئەهلی، رێكخراوە مەدەنییە‌كان، بە ژمارە و رێژە بێت، یان لایەنی چۆنایەتی و ئازادیی راستەقینەی كار و پیشە، هەر لەم سنوورەدا چڕبۆتەوە، هێشتا هەمووان هەر لێرە دەركەوتووتر و دەنگ زوڵاڵترن، تا شوێنی تری هەرێم بەگشتی.
ئەگەر پشكێكی ئەم تایبەتمەندییە دیمۆگرافییە-سیاسییە پەیوەندیی بە سروشتی دانیشتووانی زۆنەكە خۆیەوە هەبێت، كە لەژێر كاریگەریی دەسەڵاتی دەیان ساڵەی بێگانەدا، هەستیارییەكی سیاسیی رەوایان بەرامبەر بە ستەمی هەموو دەسەڵاتێكی سیاسی هەیە، بە دەسەڵاتی كوردیی خۆشمانەوە، ئەوا؛ پشكێكی تری ئەم پەراوێزە لە ئازادیی كاری سیاسی و میدیایی و ئازادیی بیروڕا و رەخنەگرتن، پەیوەندیی بە هێزی باڵادەستی زۆنەكەشە‌وە هەیە، كە باوەڕی بە بەها سیاسی و دیموكراتییەكانە، لە مێژووی سیاسیی خۆشیدا بە ئەزموون پاڵپشتی سیاسی و مەعنەوییان بووە، بگرە زۆرجار تەمویلی ئاڕاستەی تریبۆنە سیاسی و رەخنەیی و میدیاییەكانی هەرێمەكەی كردووە، بەڵگەش بریتییە لە پێشینەی دیاردەكانی فرەحزبی، كۆمەڵگەی مەدەنی، میدیای ئازاد، كە سەرلەبەر هەر لەم چوارچێوە دیمۆگرافییە-سیاسییەدا، سەریانهەڵداوە.
لەم بارەیەوە، یەكێتی، چ وەك رێكخراوێكی سیاسی، چ وەك زۆرێك لە بەرپرسانیشی، زۆرجار كارلێكی دڵخۆشكەری لەگەڵ ئەو چوارچێوە سیاسی و مەدەنی و میدیایانە، یان سەرۆك و بەڕێوەبەران و هێزی مرۆییاندا هەبووە، بەبێ منەتكردنیش رێزی لێگرتوون، بەجۆرێك كە لەناوخۆی یەكێتی خۆیدا، هەندێجار و لە هەندێ سەردەمدا رەخنەی ئەوە هاتووەتە سەر سكرتێری گشتی، سەركردایەتی، بڕیاردەرانی، كە موجامەلەی زیاد لە پێویستی ئەوانیتر دەكەن، لە قەبارەی خۆیان گەورەتر دەریانخستوون، بگرە چاوپۆشی لە هەڵە و لادانەكانیان كراوە، وەك پێویست وەڵامی هەڵوێستی نەرێنی و كاری پڕوپاگەندەیی یاخود ناپیشەییان بەرامبەر بە یەكێتی، نەدراوەتەوە.
لەوە زیاتر، هەندێ كات سەرنجی رەخنەگرانە لەناو یەكێتییەوە لە خودی یەكێتی خۆی، گەیشتووەتە ئەوەی بوترێت: زۆرجار، گرنگیدان بەوانیتر لە ئۆرگانەكانی حزبەكە و كادر و ئەندامانی خۆی زیاتربووە، لەكاتی جیاجیادا، سەرۆك و بەرپرس و بەڕێوەبە‌رانیان خزمەت و پارەدار كراون!، ئیتر بەبێ ئەوەی جەدوایەكی سیاسیی راستەوخۆیان بۆ یەكێتی هەبوو‌بێت، لایەنە مەعنەوییەكەی نەبێت، واتە ئەو سەرمایە رەمزییەی كە ئەم حزبە، لە سنووری دەسەڵاتی خۆیدا، بەڕووی هەموو هێزێكی سیاسی، رێكخراوێكی مەدەنی، دەزگایەكی میدیایی ئازاددا كراوەیە، هەر ئەو شانازییەی بۆ ماوەتەوە كە هەر لایەك، دیموكراتیانە، مەدەنییانە، دوور لە توندوتیژی و رەفتاری میلیشیایی، كاری سیاسی و پیشەیی و دیموكراتیی خۆی كردبێت، پشتگیریی كراوە، بەڵام لەبەرامبەردا، ئەوانیتر وانەبوون!.
لەم رووەوە دەوترێت: زۆرێك لەوانیتر، ئەگەر جارجارێك، دانێكیشیان بەم تایبەتمەندێتییە سیاسی و فكری و پراكتیكییەی ئەزموونی یەكێتی و سنووری نفوزیدا نابێت، ئەوا هەندێجار، تیایاندا هەبووە و هەیە كە بەداخەوە قۆستوویەتییەوە!، بگرە بۆ مەرامی سیاسی، یان بەرژەوەندیی شەخسی بەكاریهێناوە و بێلایەنیی خۆی لەدەستداوە!، هەندێکجار سوودی لێوەرگرتووە بۆئەوەی لەبەرامبەر دەستكەوتی سیاسی، یان قازانجی ماددی و پارە و تەمویل، شەڕی بەوەكالەت بۆ هێزی ركابەری سەرەكیی یەكێتی بكات!، بەڵام بە‌ناوی پارتی بەرهەڵستكارەوە، یان رێكخراوی مەدەنییەوە، یان سەنتەری داكۆكیكردن لە رۆژنامەنووسان و میدیاوە!، یان میدیای (ئەهلی و ئازاد)ەوە، ئەمەش رەفتار و هەڵوێستێك بووە، كە زیانی مەعنەویی زۆری لە یەكێتی داوە.
لەو چوارچێوەیەدا، زۆرجار پرسیارەكە ئەوەبووە: ئەی چار چییە؟.. بێگومان وەڵامی عەقڵانی و زاڵ، هەموو جارێ، ئەمە بووە: لادان و هەڵەی ئەوانیتر، ئەوانەیان كە خۆیان دەخەنە ناو گۆمی لێڵی ئەم گەمە و ململانێ ترسناكەوە لە دژی یەكێتی بۆ بەرژەوەندیی ركابەرەکانی، نابێ لە كۆتاییدا ئەم هێزە لە بیروباوەڕە دیموكرات و سەرەتا نەگۆڕەكانی پەشیمان بكاتەوە، بەڵام هاوكات، وەختێك، لە هەندێ دەوراندا، كار بگاتە پەلاماردانی ناڕەوا، هەڵمەتی پڕوپاگەندەی رەش و پەتی، ئەوا ئیتر نابێ چاوپۆشیش لە هەڵە و كەموكوڕی و لادان و شەڕە سیاسییەكانی هیچ كەس و لایەن و دەستە و تاقمێك بكرێت، راست نییە رێگەبدرێت لەژێر ناوی جیاجیادا، رای گشتی بەهەڵەدا ببرێت و دیوە جیاوازەكانی رووداوەكان بشێوێنرێن و ئاو بكرێتە ئاشی ركابەرانی یەكێتییەوە، بەڵكو پێویستە بە دوو شێواز هەڵوێستیان لێوەربگیرێت: ئەوەی بە وشە و نووسین و وتن ئەم گەمە و ململانێیە بۆ ناحەزانی یەكێتی بەڕێوەدەبات و بۆی دەبێتە بریكارێكی سیاسی و میدیایی، پیرۆزیان بێ!، بەڵام دەبێ بە وشە و نووسین و وتن، بە بەڵگەنامە و زانیاریی دروست و هەندێکجاریش بە تۆماركردنی سكاڵا وەڵامبدرێنەوە.
ئەوەشی كە لەڕێی كاری موخابەراتی و گروپی چەكدار و توندوتیژییەوە بیەوێت ئەم ململانێیە بكات، ئەوا بە ناچاری دەبێت بەهەمان ئەو ئامرازە جڵەوبكرێت كە لە ململانێكەدا پەنای بۆ دەبات و گرەوی بێسوودی لەسەر دەكات!.
No Comment! Be the first one.