چاویارنیوز – لە کاتێکدا لایەنە دەسەڵاتدارەکانی هەرێمی کوردستان هێشتا لەناو کێبڕکێی حزبی و پشکپشکێنەی دەسەڵاتدا چەقیون، چاودێری سیاسی هەردی سەڵاح زەنگی مەترسییەکی گەورە لەسەر چارەنووسی قەوارەی هەرێمی کوردستان لێدەدات و ڕایدەگەیەنێت، مۆڵەت و کاتی بەردەم دەسەڵاتی کوردی زۆر کەم ماوە و دادگای باڵای فیدراڵیی عێراق ڕۆژی ٢٦ی ئۆکتۆبەر وەک وێستگەیەکی یەکلاکەرەوە دیاری کردووە.
هەردی سەڵاح بە ئاماژەدان بە دانیشتنی چاوەڕوانکراوی دادگای فیدراڵی هۆشدارییەکی توند ئاراستەی سەرکردایەتی سیاسی دەکات و دەڵێت: «دڵنیابن، ئەگەر ئەم خوولەی پەرلەمان هەڵبوەشێنێتەوە، ئیتر ئەو هەرێمەی پێشتر دەمانناسی بە تەواوی کۆتایی دێت.»
مێژووی پاشەکشەی قەوارەکە؛ چۆن هەولێر سەروەرییەکانی لەدەست دا؟
ناوبراو ڕەخنەی توند لە خەمساردی و نەبوونی بەرپرسیاریەتی لای حوکمڕانانی هەرێم دەگرێت و زنجیرەیەک لە بڕیارە مێژوویی و تێکشکێنەرەکانی دادگای فیدراڵییان بیردەخاتەوە کە هەنگاو بە هەنگاو دەسەڵات و سەروەریی هەرێمی کوردستانیان داڕنیوە، لەوانە:
لێسەندنەوەی دۆسیەی نەوت (١٥ی شوباتی ٢٠٢٢): هەڵوەشاندنەوەی یاسای نەوت و گازی هەرێم و لەدەستدانی سەرچاوەی سەربەخۆیی ئابووری.
پەکخستنی کۆمیسیۆنی هەڵبژاردنەکان (٢٧ی ئەیلوولی ٢٠٢٢): ستاندنەوەی تەواوی دەسەڵاتەکان لە کۆمیسیۆنی باڵای هەڵبژاردنەکانی هەرێم.
لێدانی لە شەرعیەتی درێژکردنەوەی پەرلەمان (٣٠ی ئایاری ٢٠٢٣): هەڵوەشاندنەوەی یاسای ژمارە ١٢ی ساڵی ٢٠٢٢ و کۆتاییهێنان بە خولی پێنجەمی پەرلەمانی کوردستان کە دەسەڵاتدارانی هەرێم بە نایاسایی تەمەنیان درێژ کردبووەوە.
هەڵوەشاندنەوەی ئەنجومەنی پارێزگاکان (٢٤ی ئەیلوولی ٢٠٢٣): بڕیاردان لەسەر کۆتاییهاتنی شەرعیەتی خولی ئەنجومەنی پارێزگاکانی هەرێم.
دەستکاریی یاسای هەڵبژاردن و کۆتای پێکهاتەکان (١٢ی شوباتی ٢٠٢٤): گۆڕینی بنەڕەتی یاسای هەڵبژاردنەکانی پەرلەمانی کوردستان؛ کەمکردنەوەی کورسییەکان لە ١١١ بۆ ١٠٠ کورسی، گۆڕینی سیستمی هەڵبژاردن لە یەک بازنەییەوە بۆ فرەبازنەیی، و سپاردنی تەواوی پرۆسەکە بە کۆمیسیۆنی باڵای عێراق و تۆماری دەنگدەرانی فیدراڵ.
ڕادەستکردنی دۆسیەی دارایی (تەوتین): بڕیاری بەبانکیکردنی (تەوتین) مووچەی مووچەخۆرانی هەرێم لە ڕێگەی بانکە فیدراڵییەکانەوە، کە کۆتایی بە یاریپێکردنی قووتی هاووڵاتییان لەلایەن دەسەڵاتی هەرێمەوە هێنا.
بەرەو دادگاییەکی مێژوویی لە ٢٦ی ئۆکتۆبەر
چاودێران بە پشتبەستن بەم هۆشدارییانە پێیان وایە کە عینادیی حزبی، بێباکی بەرامبەر یاسا و پابەندنەبوون بە دەستوور، دەسەڵاتدارانی هەرێمی گەیاندووەتە لێواری کەوتن؛ بەجۆرێک ئەگەر بڕیاری ٢٦ی مانگی دادگای فیدراڵی بە ئاراستەی پووچەڵکردنەوەی کارەکانی پەرلەمان و حکومەت بشکێتەوە، ئەوا پێگەی نیمچەسەربەخۆی هەرێم بۆ چوارچێوەیەکی ئیداریی تەواو لاواز و فەرمانبەر لە بەغدا کورت دەبێتەوە و بەرپرسیاریەتی مێژوویی ئەم داڕمانەش لە ئەستۆی ئەو کەسانەیە کە لە کاتی خۆیدا گوێیان لەم هۆشدارییانە نەگرت.
No Comment! Be the first one.