چاویارنیوز ـــ بەگوێرەی ڕادیۆسپۆری تورکیا، یانەی بەرشەلۆنە بیر لە بژاردەی جۆراوجۆر دەکاتەوە بۆ ڕاکێشانی هێرشبەرێک لە گواستنەوەکانی هاوینەی 2026دا، هەروەها ڤیکتۆر ئۆسیمن یەکێکە لەو ناوە جدیانەی کە لە لیستی یانەکەیدایە.
سەرچاوە نزیکەکان لە یانەی گالاتاسەرای کە ئێستا خاوەنی هێرشبەرە نەیجیریایەکە ئاشکرایانکردووە، ڕێککەوتنێکی زارەکی لە نێوان هەردوولادا هەیە کە ئەگەر ئۆفەرێک لە یانەیەکی گەورەی ئەوروپی وەربگیرێت، ئەوا ڕێگە بە ڕۆیشتنی ئۆسیمن دەدرێت.
ئۆسیمن، کە وەرزی ڕابردوو بە ئاستێکی درەوشاوە لە خولی سوپەری تورکیا سەرنجی زۆرێک لە یانە گەورەکانی ڕاکێشا، ئێستا یەکێکە لە ئامانجە سەرەکییەکانی چەندین تیپی دیار، لەوانە بەرشەلۆنە و چێڵسی و پاریس سانجێرمان. بەڵام ڕەنگە دۆخی دارایی بەرشەلۆنە و سنووردارکردنی فەیر پلەی لالیگا ڕێگری بکات لە گرێبەستێکی گەورە بە شێوەی کاش.
بەگوێرەی زانیارییەکان، یانەی بەرشەلۆنە جگە لە ئۆسیمن چاودێری چەند بژاردەیەکی دیکە دەکات، لەوانەش جولیان ئەلڤارێز، بەڵام پاوەر پلەی و خێرایی ئۆسیمن بەتەواوی هەمان ئەوەیە کە ستافی ڕاهێنەرایەتی هانسی فلیک بەدوایدا دەگەڕێن. لەلایەکی دیکەوە یانە تورکییەکە بەڵێنیشی داوە ئەگەر ئۆفەرێکی دروستی بۆ هات، هیچ ئاستەنگێک بۆ ڕۆیشتن دروست نەکات، ئەمەش لەپێناو پاراستنی پەیوەندییەکی ئەرێنی لەگەڵ یاریزانەکە و بەڕێوەبەرەکەیەتی.
هێشتا گفتوگۆی فەرمی نێوان هەردوو یانە دەستی پێنەکردووە، بەڵام سەرچاوە ئیسپانییەکان دەڵێن بارسێلۆنا لە ناوخۆدا پێداچوونەوە بە دۆخی دارایی خۆی دەکات بۆ ئەوەی هەنگاوێکی لەو شێوەیە ئەنجام بدات.
No Comment! Be the first one.