مەترسیی کەمبوونەوەی کورسییەکانی پەرلەمانی هەرێمی کوردستان؛ قەیرانێک قووڵتر لە بودجە

چاویارنیوز – لێدوانەکانی ئەم دواییەی «ئامانج ڕەحیم»، سکرتێری ئەنجومەنی وەزیرانی هەرێمی کوردستان، ڕەهەندێکی نوێی مەترسییەکانی ناکۆکیی ئاماریی نێوان بەغدا و هەولێر دەخاتەەڕوو. ناوبراو هۆشداری دەدات کە کەمکردنەوەی رێژەی دانیشتوانی هەرێمی کوردستان تەنها کێشەیەکی دارایی و بودجە نییە، بەڵکو مەترسییەکی گەورەیە بۆ سەر پێگە سیاسی و دەستوورییەکانی کورد لە ناوەنددا.

بەپێی ئەم هۆشدارییە، دابەزینی ڕێژەی دانیشتوانی هەرێم لە ١٤.١٤٪ بۆ ١٢.٧٪، تەنها مانا بۆ کەمکردنەوەی پشکە بودجە و مووچە ناگەیەنێت، بەڵکو ڕاستەوخۆ کاریگەری لەسەر پشکی هەرێم لە پەرلەمانی عێراق دەبێت. بەپێی ماددەی ٤٩ی دەستووری عێراق، بۆ هەر سەد هەزار کەسێک کورسییەک لە پەرلەمان تەرخان دەکرێت.

بەو پێیە، ئەگەر ٣٢٩ کورسییەکە دابەش بکرێت:

بە ڕێژەی ١٤.١٤٪، پشکی هەرێم دەبێتە نزیکەی ٤٧ کورسی.
بە ڕێژەی ١٢.٧٪، پشکی هەرێم کەم دەکاتەوە بۆ نزیکەی ٤٢ کورسی.
ئەمەش بە مانا مەترسیی لەدەستدانی نزیکەی پێنج کورسیی پەرلەمانییە بۆ هەرێمی کوردستان. هەرچەندە ئەمە لە ئێستادا زیاتر خەمڵاندنە، بەڵام قەبارەی هەڕەشە دەستووری و سیاسییەکانی داهاتوو نیشان دەدات.

ڕووی ڕەخنەیی:

ئەم هۆشدارییە لە کاتێکدایە کە حکومەتی هەرێمی کوردستان خۆی تا ڕادەیەکی زۆر بەرپرسە لە دروستبوونی ئەم قەیرانە قووڵە پێکهاتەییانە. دەیان ساڵ لە بەڕێوەبردنی خراپ، ناڕوونی لە ئامارە ناوخۆییەکان، نەبوونی سەرژمێریی دروست و بێتوانی لە دروستکردنی بنکەدراوەی متمانەپێکراو، دەرفەتی بە بەغدا داوە بە ئارەزووی خۆی ئامارەکان بگۆڕێت و پێگەی هەرێم لاواز بکات. حکومەتی هەرێم لە بەرگریکردن لە مافەکان تەنها بە لێدوان و هۆشداریی دوای ڕووداوەکان ڕازی دەبێت، لە کاتێکدا پێویستی بە ستراتیژێکی زانستی، دیپلۆماسییەکی چالاکی حقوقی و شەفافییەت هەبوو بۆ ئەوەی ڕێگری لەم داڕمانە بکات.