چاویارنیوز – لە پێشێلکارییەکی تری گەورە و مەترسیداردا کە تۆڕەکانی قاچاخچێەتیی دەسەڵاتداران تێوەگلاون، بازرگانێکی گەنجی سەر بە بنەماڵەی بارزانی بە ناوی «ئاراس جەلال قادر» لە شاری ئەستەنبوڵی تورکیا بە تۆمەتی هەڵگرتنی ۲۱۳ کیلۆگرام مادەی هۆشبەری جۆری کریستاڵ و مێتامڤێتامین، دەستگیرکرا، کە نرخی ئەو مادە ژهراوییانە بە زیاتر لە ۱۰ ملیۆن دۆلار دەخەمڵێنرێت.
بەپێی ئەو زانیارییە وردانەی کە لە سەرچاوەیەکی تایبەت و باوەڕپێکراوی ناوخۆی پارتییەوە دەستکەوتوون، ئاراس جەلال، کە کوری خوشکی «غازی بابکەیی» (بەرپرسی دیاری هێزەکانی زێرەڤانییە)، خاوەنی مێژوویەکی تاوانکاریی گەورەیە. ناوبراو چەند ساڵێک لەمەوبەر لەسەر دزینی بە ملیۆنان دۆلار و گەندەڵی زەبەلاح لە زێرەڤانی لێکۆڵینەوەی لەسەر کرابوو و تەنانەت لەلایەن «پاراستن»یشەوە بۆ ماوەیەک دەستگیر کرابූ، بەڵام بەهۆی ئەوەی خزم و نزیکی غازی بابکەیی بوو، هەر زوو ئازاد کرا و چەند کەسێکی تریان کردە قوربانی و وەک بەرزەکی بانان لێی دەرچوو.
ئێستاش، ئەم گەنجە قاچاخچییە کە کەوتووەتە تورکەکانەوە، بڕیاربەدەستانی باڵای ماڵی بارزانی خستووەتە دۆخێکی یەکجار هەستیار و تەنگەتاوەوە؛ سەرچاوەکە ئاماژەی بەوە کردووە کە زۆرینەی بەرپرسانی باڵای پارت خەریکی هەوڵدان و تەقەلای چڕن بۆ داپۆشین و چارەسەرکردن و دەرکردنی لەو قەیرانە نێودەوڵەتییە، چونکە هەم بە ناو «بارزانی»یە و هەمیش تۆڕە خێڵەکی و حزبییەکانیان لە پشتەوەیە.
گومانی زۆر لەسەر ئەم بابەتە هەیە کە ئەم بازرگانە مەترسیدارە تەنها کارەکتەرێکی سەربەخۆ نییە، بەڵکو دەستی بەرپرسانی باڵای هەرێمیش لە پشت ئەم کاروانە گەورەیەی مادەی هۆشبەرەوەیە، و هەر بۆیەشە کە دەسەڵاتداران لە هەولێر هێندە بەرتەنگەتاو بوون و هەوڵی شاردنەوەی فزیحییەکە دەدەن.
No Comment! Be the first one.