دادگای تورکیا هاوسەرۆکانی پێشووی هەدەپە ئازادناکات

چاویارنیوز _ دادگای باڵای 22ـی سزا قورسەکانی ئەنقەرە، داواکاریی دەمپارتیی بۆ ئازادکردنی سەڵاحەدین دەمیرتاش و فیگەن یوکسەکداغ، هاوسەرۆکانی پێشووی هەدەپەی ڕەت کردەوە.
بەپێی ڕاگەیەنراوی ڕۆژی 8ـی تەمووز، دادگای مافی مرۆڤی ئەورووپا، بۆ جاری سێیەم هێشتنەوەی دەمیرتاش و یوکسەکداغ و هاوڕێکانیانی لە دەستبەسەریدا بۆ ماوەیەکی درێژ، بە پێشێلکردنی مافی مرۆڤ ناو برد و داوای لە تورکیا کرد ئازادیان بکات.
دەمپارتی لە 11ـی ئەم مانگەدا بە پاڵپشتیی بڕیارەکەی دادگای مافی مرۆڤی ئەورووپا، داواکاریی بۆ ئازادکردنی هاوسەرۆکانی پێشووی هەدەپە و هاوڕێکانیان پێشکەش کرد.
دادگای باڵای 22ـی سزا قورسەکانی ئەنقەرە بە پاساوی ئەوەی بڕیارەکەی دادگای مافی مرۆڤی ئەورووپا هێشتا یەکلاکەرەوە نییە و پلەی کۆتایی وەرنەگرتووە، ڕەتی کردەوە ئازادیان بکات.
یەکەمجار لە 20-11-2018، دادگای مافی مرۆڤی ئەورووپا بڕیارێکی بۆ ئازادکردنی دەمیرتاش دەركرد و داوای لە دادگای توركیا كرد ڕێكاری پێویست بگرێتەبەر بۆ جێبەجێکردنی. دادگای ئەورووپا پێی وابوو دەستگیركردنەكەی دەمیرتاش بە تۆمەتی تیرۆر، هەوڵێك بووە بۆ “كرپكردنی دەنگی جیاواز.”
دەمیرتاش و یوکسەکداغ لە 4ـی تشرینی دووەمی 2016دا دەستگیر کران و ماوەی نزیکەی نۆ ساڵە لە زینداندان. چەندین تۆمەتی جیاوازیان دراوەتە پاڵ. دەستگیرکردنەکەیان مشتومڕێکی زۆری لە ناوخۆی تورکیا و دەرەوەش دروست کرد، بەڵام تورکیا ڕەتی کردەوە ئازادیان بکات و ئەردۆغان وتی “پابەندی بڕیارەکە نابین”.