ئەگەر لە مێژووی سیاسیی هەر هاوکێشەیەکدا شتێک هەبێت کە بە ڕوونی شکستی ئەخلاقی و سیاسیی دەسەڵاتداران نیشان بدات، ئەوا «باوەشکردنەوەیە بە خۆفرۆشان و هەڵگەڕاوەکاندا». ئەوانەی ڕۆژێک لە ڕۆژان بە درووشمی ڕووخاندنی دار و بەرد خۆیان کردە پێشڕەوی خەڵکی ستەمدیدە و لەسەر حسابی ڕقی جەماوەر کورسی و پێگەی خۆیان قایم کرد، ئەمڕۆ بوونەتە گەورەترین گاڵتەجاڕ و زەلیلترین بەرگریکاری هەمان ئەو سیستمەی کە ڕۆژ تا ئێوارە سووکایەتییان پێ دەکرد.
ئەم جۆرە مرۆڤە هەلپەرست و بێپرەنسیپانە، هەر کاتێک بەرژەوەندیی تەسک و کورتمەودایان بخوازێت، بە ئاسانی ڕەنگ دەگۆڕن و پێستی پێشوویان فڕێ دەدەن. کڕینەوە و باوەشکردنەوە بەم بەناو ڕەخنەگر و ئۆپۆزسیۆنانەی دوێنێ، نەک هەر دەستکەوت نییە، بەڵکو گەورەترین گورزە لە مۆڕاڵی کۆمەڵگا و پەرەپێدانی کلتووری «خۆفرۆشیی ئاساییکراو».
لە لایەکی ترەوە، پێدانی پۆست و پێگە بەم جۆرە کەسانە، زوڵمێکی گەورەیە لەو تێکۆشەر و ئەندامە کۆنانەی کە لە ڕۆژە سەختەکاندا سینەیان کردە قەڵغان، کەچی ئێستا پەراوێز خستراون و جێگەکانیان بە کۆمەڵێک ماستاوچی و دووڕووی سیاسی پڕ کراوەتەوە.
دەبێت دەسەڵاتداران لەو ڕاستییە تێبگەن: ئەو کەسەی لە پێناو بەرژەوەندییەکی کاتیدا باوەڕ و مێژووی خۆی دەفرۆشێت، سبەی لە یەکەم وێستگەی لاوازبووندا، بە هەمان ئاسانی ئاغاکانی ئەمڕۆشی دەفرۆشێت. باوەشکردن بەم مۆرە ژێربەڕە و نەبووانەدا، هێز نییە، بەڵکو هێنانی مۆرانەیە بۆ ناو کۆڵەکەی ماڵەکەی خۆت؛ مۆرانەیەک کە زوو یان درەنگ، لەناوەوە بناغەکەت کلۆرت دەکات و دەڕووخێنێت.
No Comment! Be the first one.