بەغدا داوا دەکات نرخی بەنزین لە هەرێمیش بکرێتە 450 دینار یان بگەڕێندرێتەوە بۆ عێراق

چاویارنیوز – پەرلەمانی عێراق لیژنەیەکی باڵای بۆ لێکۆڵینەوە لە چارەنوسی ئەو 50 هەزار بەرمیل نەوتە ڕۆژانەیە پێک هێنا کە بۆ دابین کردنی بەنزینی پاڵپشتی کراو بە هەرێمی کوردستان دەدرێت،هاوکات پلانی دابەش کردنی بەنزین بە سیستەمی کۆبۆن بەسەر هاوڵاتییاندا تاوتوێ دەکرێت.
جوانرۆ محەمەد،ئەندام پەرلەمانی کوردستان لە میانی بەشداری لە بەرنامەی رۆژەڤی KNN ڕایگەیاند لیژنەکەی پەرلەمانی عێراق بە واژۆی سەرۆکی پەرلەمان و بە بەشداری وەزیری نەوتی عێراق پێک هێنراوە،ئامانجی سەرەکی لیژنەکە ورد بینییە لە شێوازی پاڵاوتن و دابەش کردنی ئەو 50 هەزار بەرمیل نەوتەی ڕۆژانە دەدرێتە هەرێمی کوردستان.
ئاماژەی بەوەش،کر لەو بڕە نەوتە، ڕۆژانە زیاتر لە سێ ملیۆن و 500 هەزار لیتر بەنزین بەرهەم دەهێنرێت،بەڵام تەنها ملیۆنێک و 900 هەزار لیتری بە نرخی 750 دینار دەدرێتە هاوڵاتییان،کە ئەمەش بڕێکی زۆر کەمە و چارەنووسی بەشە زۆرەکەی دیکەی نادیارە.
لە بەشێکی دیکەی قسەکانیدا، ئەو پەرلەمانتارە ڕوونی کردەوە کە بەغدا دوو بژاردەی خستووەتە بەردەم هەرێمی کوردستان؛یان دەبێت نرخی بەنزین هاوتا بکرێت لەگەڵ ناوەڕاست و خوارووی عێراق کە 450 دینارە،یان ئەو بڕە نەوتە بگەڕێندرێتەوە بۆ عێراق.
هەروەها ڕەخنەی توندی لە قۆرخکارییەکانی ناوخۆی هەرێم گرت و ڕایگەیاند کە بە هۆی قۆرغ کردنی داهات و سامانە سروشتییەکانەوە،هاوڵاتییانی هەرێمی کوردستان ناچار بوون بۆ دابین کردنی مافە سەرەتاییەکانیان چاویان لە بڕیارەکانی بەغدا بێت و لەوێوە بە دوای چارەسەردا بگەڕێن.