ناوککەوتن یەکێکە لەو کێشە باوانەی کەوا لە پزیشکی نەریتی و لە نێوان خەڵکدا زۆر باسی لەسەر دەکرێت. ئەم ڕووداوە بەزۆری ئێشی سک، بێهێزی، یان کێشەی کۆئەندامی هەرسی لەگەڵدایە. کەوابوو زۆربەی خەڵک بەدوای چارەسەری ناوککەوتندان بە شێوازی جۆراوجۆر و بەبێ ئەوەی سەردانی پزیشک بکەن.
ئەگەرچی لەبواری زانستی پزیشکی باودا هێشتا ئەم بابەتە پشتڕاست نەبووەتەوە، بەڵام شێوازی جوراوجۆر لە پزیشکی نەریتی و خۆماڵیدا بۆ چاککردنەوەی ئەم حاڵەتە بوونی هەیە. لە درێژەدا بە وردی هۆکار و نیشانەکان و شێوازی چارەسەری ئەم ئازارە دەخرێتە ڕوو.
ناوککەوتن چییە و نیشانەکانی چین؟
ناوککەوتن وەکوو دەستەواژەیەک وایە کە زۆرتر لە نێوان خەڵک و لە پزیشکی نەریتیدا بەکار دێت و بە حاڵەتێک دەوترێت کە کەس هەست دەکات “ناوک” لە شوێنی سەرەکی خۆیدا نەماوە و جووڵاوەتەوە. جێ بە جێ کردنی کاری قورس، بەرزکردنەوەی کەلوپەل، دڵەڕاوکێ و سترێس یان تەنانەت لێدان دەبێتە هۆی سەرهەڵدانی ئەم کێشەیە.
بەزۆری ئەم دۆخە ئێشی سک، هەست بە قورسی، بای ورگ، بێهێزی و تەنانەت کەم مەیلی بۆ خۆراکیشی لەگەڵدایە. لەهەر حاڵدا دەبێتە ئەوە لەبەرچاو بگرین کە لە پزیشکی باودا، شتێک وەکو ناوک کەوتن بەشێوازی فەرمی پێناسه ناکرێت و ئەم بابەتە زۆرتر لە پزیشکی نەریتیدا بوونی هەیە.
شێوازی چارەسەرکردنی ناوکگرتنەوە
لە پزیشکی نەریتی و خۆماڵیدا شێوازی جوراوجۆر بۆ چارەسەری دەستبەجێ ناوککەوتن پێشنیار دەکرێت کە بریتییە لە شێوازی چارەسەری گیایی و هەروەها چارەسەر بە کەڵکوەرگرتن لە هەندێ جووڵەی تایبەت. لە درێژەدا ئاماژە دەکرێتە گرنگترین شێوازەکان.
هەروەها بخوێنەوە: نوێترین ڕەوتی چارەسەری نەزۆکی پیاوان و خانمان
ماڵشتی(لەپماڵ) سک
یەکێک لە باوترین شێوازەکان لەپماڵکردنی سکە بە وردی و بە ئارامی. ئەم کارە بە کەڵکوەرگرتن لە لەپی دەست و بە جۆڵەی بازنەیی ئەنجام ئەدرێت تاکوو یارمەتی بدرێت کە ناوک بگەرێتەوە بۆ حاڵەتی سروشتی خۆی. بەجۆرێک کەوا دەست لەسەر ئەو شوێنە دادەنین کە هەست دەکەین ناوک لەوێیە و هەمان شوێن بەشێوازی بازنەیی دەجووڵێنینەوە، ماڵشتی سک دەبێ بەئارامی و لە ماوەی 10بۆ 15خوڵەکدا ئەنجام بدرێت.
بەکارهێنانی پەرداخ یان باکێش
هەندێ کەس لەشێوازی دانانی پەرداخ یان باکێش لەسەر ناوک کەڵکوەردەگرن بەشێوازێک کە پەرداخەکە بەتوندی لەسەر سک دادەنن و پاشان بەئارامی هەڵیدەگرن. ئەم کارە دەبێتە هۆی هەڵکێشانی ناوک و چاککردنەوەی دۆخەکەی بۆ حاڵەتێکی سروشتی. شێوازی ئەنجامدانی ئەم کارە تۆزێ قورسە و پێویستی بە وردەکاری زۆرە.
بەستنی شاڵ لەسەر سک
لەم شێوازەدا شاڵێکی قورس و قایم(نە زۆر قورس) لەسەر سک دەبەسترێت تاوەکوو ناوک لەشوێنی خۆیدا بێجووڵە بمێنێتەوە. کاتی بەستی شاڵ لەسەر سک بەستراوە بە توندی دەرچوونی ناوک لە شوێنی خۆیدا. هەڵبەت ئەم شێوازە زۆرتر تەواوکەری شێوازەکانی دیکەیە و بە تەنێ چاککەرەوە نییە.
دەمکردنی ڕووەک و خواردنەوەی
بەکارهێنانی نەعنا و زەنجەفیلی دەمکراو بۆ کەمکردنەوەی بای ورگ و چاککردنەوەی کێشەی کۆئەندامی هەرس پێشنیار دەکرێت. لە بەکارهێنانی زیاد لە ڕادە و جۆراوجۆری گیادەمکراوەکان خۆتان بەدوور بگرن چونکە لەوانەیە تووشی ئازاری ورگ یان کێشەی دیکە ببن.
پاڵکەفتن و وچانگرتنی تەواو
وچانگرتن بە تایبەت پاڵکەفتن بە پشتەو و خۆ دوورخستنەوە لە چالاکی قورس، دەتوانێت یارمەتیدەر بێت کە نیشانەکان چاک بکاتەوە و دەرفەت بداتە لەش کە بگەڕێتەوە بۆ حاڵەتی سروشتی خۆی.
هەروەها بخوێنەوە: دابەزانی کێش لە ڕێگەی وەرزش و ڕژیمگرتن
باشترین خۆراک بۆ چاککردنەوەی دەستبەجێ ناوککەوتن
بەکارهێنانی هەندێ خۆراک دەتوانێ لە کەمکردنەوەی ئێش و بای وڕگ و هەست بە قورسی کە بەهۆی ناوککەوتنەوە سەری هەڵداوە کاریگەر بێت. دەمکراوەی نەعنا و زەنجەفیل بە هۆی تایبەتمەندی ئارامکەرەوە و یارمەتیدانی کاری هەرس کردن وەکوو بژاردەیەکی زۆر باش دێنە ئەژمار. هەروەها دەمکراوە یان ئارەقی ڕازیانە بۆ کەمکردنەوەی بای وڕگ و ڕێکخستنی کاری گەدە زۆر کارکردێکی باشی هەیە.
لە گەڵ هەموو ئەمانەشدا خواردنەوەی ئاوی شیتین(گەرم) لەگەڵ هەنگوێن یارمەتیدەرە بۆ بەهێزکردنی لەش. باشتر وایە لەم خولەدا خۆراکی سووک، لەوانە چێشت و برنجی ساکار بەکار بێت و لە بەکارهێنانی خۆراکی قورس و چەور خۆتان بەدوور بگرن. خورماش وەکوو خۆراکێکی پڕئێنێرجی دەتوانێت بۆ چاککردنەوەی دەستبەجێ نیشانەکان زۆر کاریگەر بێت.
بەرگریکردن لە ناوککەوتن
بۆ بەرگریکردن لە ناوککەوتن، باشتر وایە لە بەرزکردنەوەی کەلوپەلی زۆر قورس بە شێوازی نادرووست، خۆ بەدوور بگرن. چالاکی زۆر قورسیش بە ڕاهێنانی لەپێشەوە ئەنجام بدەن با گۆشاری لەناکاو نەخرێتە سەر سک. هەروەها خۆراکی سووک و دوورکەوتنەوە لەو خۆراکانە کەوا بای وڕگ زیاد دەکات دەتوانیت زۆر یارمەتێدەر بێت بۆ تەندرووستی و سەلامەتی سک.
بە لەبەرچاوگرتنی ئەم چەن خاڵە ساکارە بە ئاسانی ناوککەوتن چارەسەر دەکرێت. ئەگەر نیشانەکانی ناوککەوتن سەری هەڵدا، هەوڵ بدە سەرەتا لە شێوازی ساکار وەکوو پشوو و بەکارهێنانی دەمکراوەی گیایی کەڵکوەربگریت. ئەگەر ئێش و ئازارەکە زۆر توند بوو، باشتر وایە لە کەسێک کە پێشتر ئەزموونی ناوکگرتنەوەی هەیە کەڵکوەربگریت.
No Comment! Be the first one.