چاویارنیوز – ئەمڕۆ دووشەممە ٤ی ئایاری ٢٠٢٦، ساڵڕۆژی ڕفاندنی ڕۆژنامەنووس و خوێندکاری زانکۆ سەردەشت عوسمانە کە لە ناو جەرگەی شاری هەولێر ڕفێندرا و دوای دوو ڕۆژ تەرمەکەی بە ئەشکەنجەدراوی لە موسڵ دۆزرایەوە و تا ئێستای لەگەڵ بێت، دەسەڵات و میدیاکانی باسی ئەو دۆسیەیان نەکردووە و ئەنجامدەران دەستگیرنەکراون.
گرنگترین خاڵەکانی دۆسیەی ڕفاندن و تیرۆری سەردەشت عوسمان:
• ڕفاندن و کوشتن: سەردەشت عوسمان لە ٤ی ئایاری ٢٠١٠ لەبەردەم کۆلێژی ئاداب ڕفێندرا و لە ٦ی ئایاردا تەرمەکەی دۆزرایەوە کە شوێنەواری فیشەک و ئەشکەنجەی توندی پێوە بوو کە ئەمەش شەپۆلێکی گەورەی ناڕەزایەتی جیهانی لێکەوتەوە.
• تۆمەتبارکردنی مەسرور بارزانی: بنەماڵەی سەردەشت عوسمان و چالاکوانان مەسرور بارزانی کە ئەو کات سەرۆکی ئەنجومەنی ئاسایشی هەرێم بوو بە بەرپرسیاری سەرەکی دەزانن و پێیان وایە ڕفاندنی گەنجێک لە شارێکی پڕ لە بازگە و کامێرای وەک هەولێر بەبێ ئاگاداری و ڕەزامەندی دەزگا ئەمنییە باڵاکان مەحاڵە.
• هۆکاری تیرۆرکردنەکە: زۆربەی ئاماژەکان بۆ نووسینە ڕەخنەییەکانی سەردەشت دەچن بەتایبەت گوتاری من عاشقی کچەکەی بارزانیم کە تێیدا هێڵە سوورەکانی دەسەڵاتی بەزاندبوو و بەو هۆیەشەوە پێشتر نامەی هەڕەشەی لێکردنی بۆ نێردرابوو.
• ڕەتکردنەوەی ڕاپۆرتە فەرمییەکان: لیژنەی لێکۆڵینەوەی حکومەت لەو کاتەدا هەوڵیدا کوشتنی سەردەشت بە گرووپە تیرۆریستییەکانەوە ببەستێتەوە بەڵام ئەم سیناریۆیە لەلایەن ڕێکخراوە نێودەوڵەتییەکانی وەک هیومان ڕایتس وۆچ و لێبوردنی نێودەوڵەتی بە توندی ڕەتکرایەوە و بە هەوڵێک بۆ شاردنەوەی بکوژە ڕاستەقینەکان وەسف کرا
تا ئێستاش ئەم دۆسیەیە وەک یەکێک لە گەورەترین ئاڵەنگارییەکانی بەردەم ئازادیی ڕادەربڕین و دادپەروەری لە هەرێمی کوردستان ماوەتەوە و ساڵانە لەم یادەدا داوای دادگاییکردنی تۆمەتبارانی پلە یەک دەکرێتەوە.
نەگەیشتنە ئەنجامی دۆسیەکەی تیرۆرکردنی سەردەشت عوسمان و نادیارمانی بکوژەکانی، لە کاتێک دایە کاناڵەکانی پارتی و حکومەتەکەی مەسرور بارزانی بەردەوام باسی بوونی ئازادی ڕۆژنامەگەری دەکەن و لە ئاست دۆسیەی تیرۆری ڕەخنەگرانی خۆیان هیچ کاردانەوەیەکان نەبووە.
No Comment! Be the first one.