چاویارنیوز – ڤینیسیۆس جونیۆر ئەستێرەی بەڕازیلی یانەی ڕیال مەدرید تەنها چەند خولەکێک دوای فیکەی کۆتایی یارییەکەی بەرامبەر سیڤیلیا بە کردارێکی بەرچاو سەرنجی هاندەران و میدیاکانی بۆ خۆی ڕاکێشا؛ کردارێک کە ڕەنگدانەوەی بەرفراوانی لە سۆشیال میدیا هەبوو و کاردانەوەی نەرێنی هەندێک لە هاندەرانی ڕیاڵی لەگەڵدا بوو.
لە زاری ڕۆژنامەی مارکاوە، ڤینیسیۆس دوای کۆتاییهاتنی یارییەکە وێنەی پڕۆفایلی سۆشیال میدیای خۆی گۆڕیوە. ئەو وێنەیەی کە پێشتر بە درێسێکی ڕیاڵ مەدرید بڵاوی کردبووەوە سڕیەوە و لە شوێنیدا وێنەی خۆی دانا کە بە درێسی هەڵبژاردەی بەڕازیلەوە یاری دەکات؛ گۆڕانکارییەک کە لەلایەن زۆرێک لە هاندەرانەوە وەک کاردانەوەیەکی سۆزداری بەرامبەر بە ڕووداوەکانی ناو یاریگا لێکدرایەوە.
ئەم کارە لە دۆخێکدا ئەنجامدرا کە ڤینیسیۆس لە هەندێک لە ستاندەکانی یاریگاکانەوە ڕووبەڕووی فیکەی ناڕەزایەتی و گاڵتەجاڕانە بووەوە کاتێک لە کاتی یاری بەرامبەر سیڤیلیا گۆڕدرا. دەوترێت ئەو یاریزانە بە بێزارییەوە یاریگای بەجێهێشتووە، ئەمەش وایکردووە کەشوهەوای دەوروبەری چەند هێندەی تر لە پێشوو گرژتر بێت.
ڕۆژنامەی مارکا لە ڕاپۆرتەکەیدا تیشکی خستۆتە سەر ئەوەی کە گۆڕینی وێنەی پڕۆفایلەکەی ڤینیسیۆس بەتایبەت لەم قۆناغەی وەرزدا و دوای کاردانەوەی نەرێنی یاریگاکان، توڕەیی و ڕەخنەی بەرفراوانی هاندەرانی ڕیال مەدرید لە سۆشیال میدیای لێکەوتووەتەوە، هەندێکیش بە نیشانەی دوورکەوتنەوەی سۆزداری ئەستێرە بەڕازیلییەکە لە کەشوهەوای ئێستای یانەکە دەزانن.
No Comment! Be the first one.